Mehmet Emîn Aslan ê ku piştî 30 salan ji Girtîgeha Girtî ya Tîpa F a Hejmar 1 a Tekîrdagê tehliye bû li bajarê xwe yê Wanê ji aliyê malbat, nûnerên partiyên siyasî, rêxistinên civaka sivîl û girseyek mezin ve hat pêşwazîkirin.
Merasîma pêşwazîkirinê bi pêşengiya Komeleya Alîkarî û Hevgirtina bi Malbatên Girtî û Mehkûman re (TUHAY-DER) de li balafirehê hat lidarxistin. DEM Partî, Meclisa Dayikên Aştiyê, aktîvîstên Tevgera Jinên Azad (TJA) û gelek kes beşdarî pêşwazîkirinê bûn. Di merasîma pêşwazîkirinê de dirûşmeya “Bijî berxwedana zindanan” hat berzkirin.
Piştre Aslan bi karwanek wesayîtan çû mala malbata xwe ya li taxa Xaçort a navçeya Rêya Armûşê. Hevberdevka Înîsiyatîfa Yekîtiya Demokratîk Gulcan Kaçmaz Sayyîgît li wir axivî. Gulcan Kaçmaz Sayyîgît li ser pêvajoya aştiyê nirxandin kir û diyar kir ku divê gavên şênber werin avêtin.
DERBARÊ MEHMET EMÎN ASLAN DE
Mehmet Emîn Aslan piştî ku di sala 1996’an de li Edeneyê hate binçavkirin, ji aliyê Dadgeha Ewlehiya Dewletê ve cezayê heta hetayê lê hate birîn. Aslan ê ku di gelek girtîgehan de ma, di 26’ê Gulanê de ji Girtîgeha Girtî ya Tîpa F ya Hejmar 1 a Tekîrdagê tehliye bû.
