Rêxistina Mafên Mirovan a Kurdistanê têkildarî zextên Îranê yên li dijî jinan raporek weşand.
Li gorî raporê li bajarê Qoçanê yê Xorasanê, jina ciwan a 26 salî Rozya Eydînejad 49 roj in di girtîgeha Îstîxbarata Supaya Pasdaran de ye. Tevî ku dema binçavkirina wê meheke din jî hatiye dirêjkirin, dadgeh ti agahiyê nade malbata wê.
Li aliyê din, li bajarê Bokanê, hêzên îstîxbaratê bi ser mala Cemîle Mihemedemîn Nazir û hevjînê wê Xoşnav Ezîzpûr de girt. Her du jî hatin girtin, lê hevjînê wê piştî çend saetan serbest hat berdan. Ji wê rojê ve 30 roj derbas bûn, lê hîn jî nayê zanîn ka Cemîle li ku ye û di çi rewşê de ye.
Di heman raporê de fikar li ser jiyana girtiyeke 61 salî ya bi navê Şîva Îsmaîlî jî têne kirin. Şîva ku li Girtîgeha Evîn a Tehranê ye û 10 sal cezayê girtîgehê lê hatî birîn, nû ameliyata piştê kiriye. Tevî ku wê bi pereyê xwe ev ameliyat kiriye jî, rayedarên zîndanê dixwazin wê zû vegerînin girtîgehê.
Li gorî raporê Hêzên Supaya Pasdaran Şîva piştî ameliyatê li ser textê nexweşxaneyê kelepçe kirine.
Ev zext û girtin nîşan didin ku zextên dewleta Îranê ya li dijî jin û çalakvanên Kurd tenê bi zîndanîkirinê bi dawî nabe; ew agahiyan ji malbatan vedişêrin, mafên wan ên qanûnî binpê dikin û tenduristiya wan dixin metirsiyê.
