Li gorî dîmenên belavbûyî, artêşa Tirkiye bi amûrên giran yên leşkerî li Geliyê Reşava ya bajarokê Dêrelokê girêdayî navçeya Amêdiyê ye dest bi çêkirina rêyeke nû ya leşkerî kiriye.
Ji ber çêkirina rê gelek xwezaya herêmê bi teqemeniyan hatiye hilweşandin û bi taybet cihên xwezayî yên dikeve Geliyê Reşava.
Ev hewldana dewleta Tirk ya li herêmê zextê li welatiyan dike ku mal û gundên xwe yên li herêmê vala bikin.
Hêjayî bibîr xistinê ye dewleta Tirk ji sala 2019’an ve bi hinceta cuda cuda li Herêmên Başûrê Kurdistanê dest bi operasyonên leşkerî dikir. Heta niha bi dehan navend û baregehên leşkerî û îstixbaratî li nava xaka Herêma Kurdistan û Iraqê hene. Ev êriş û operasyon bûn sedemê valakirina bi sedan gund û şehîdkirina gelek welatiyên sivîl yên li Herêmê.
Li aliyê din nêzî salekê ye pêvajoyek di navbera Tirkiye û Rêber Apo de heye û di vê çarçoveyê de Tevgera Azadiya Kurd kongreya xwe pêk anî û dawî li hebûna xwe û hemû çalakiyên xwe aniye.
