Platforma Çalakiyên Hevbeş a Tevger û Rêxistinên Jinan a Bakur û Rojhilatê Sûriyeyê 15’ê vê mehê starta çalakiyên 25’ê Mijdarê da. Platformê ragihand ku çalakiyên îsal bi dirûşma “Bi hev re em civateke demokratîk û komunal ava dikin da ku tundiyê bi dawî bikin” pêk tên.
EYN ÎSA
Di çarçoveya çalakiyên bi boneya 25’ê Mijdarê de rêxistina Kongra Star a bajarê Eyn Îsa li navenda xwe ya li bajêr perwerdeyek ji bo mêran da destpêkirin.
Dewreya perwerdeyê dê 3 rojan dewam bike. Di perwerdeyê de dê semîner li ser tundiya li dijî jinan, rêbazên wê û rêbazên bidawîkrinê û avakirina malbateke durist werin dayîn.
Ji rêveberên Kongra Star Ruqeya Mihemed der barê perwerdeya ji bo mêran de diyar kir ku dê mijarên tundiya li ser jinan, rêziknameya Mala Jinan û ya Kongra Star werin şîrovekirin.
Bi heman boneyê Kongra Star semînerek li hola civînan da.
Ji rêveberên Meclisa PYD’ê ya kantona Firatê Redîa Îsmaîl semîner da. Redîa sedemên sereke yên berdewamiya tundiya li dijî jinan şîrove kir û got, nezanîna qanûnê, nebûna hişmendiya mafên jinan û rewakirina tundiyê wekî hinceta perwerdekirinê sedemên tundiyê ne.
Rebîa diyar kir ku çareseriya bingehîn a rêgirtin li pêşiya tundiya li ser jinan bi perwerde, hînkirin, belavkirina çanda wekheviya zayendî û pêşxistina aboriya jinan pêkan e.
ÇILAXA
Meclisa Jinan a PYD’ê di çarçoveya qonaxa 3’yemîn a pêngava çalakiyên bi boneya 25’ê Mijdarê de ku bi dirûşma “Bi pêşengiya jinan ber bi Sûriyeya demokratîk ve” didomîne, civînek li bajarokê Abirê yê bajarê Çilaxa yê kantona Cizîrê li dar xist.
Civîn bi beşdariya hejmareke mezin a şêniyan, endamên saziyên sivîl, xizmetguzarî, nûnerên Kongra Star û Yekitiya Jinên Ciwan li hola taziyê ya naverasta bajar pêk hat.
Piştî deqeyeke rêzgirtinê, endama Meclisa Jinan a PYD’ê Haystan Hesen cureyên tundiyê û sedemên wê şîrove kirin û got: “Tundî diyardeyeke cîhanî ye, ji zihniyeta baviksalar a civakê derdikeve ku dixwaze jinan kontrol bike. Bi tundiyê civakek ku ji hêla mêran ve serdest e xurt dike, di encamê de çanda tundiyê nifş bi nifş pêş dixe û rewşek newekhevî û bêedaletî ava dibe.”
Haystan Hesen anî ziman ku têkoşîna li dijî tundiyê ne tenê berpirsyariya jinan, lê di heman demê de berpirsyariyeke civakî ye û wiha domand: “Îslahkirin û hişyarkirina civakê bi avakirina hevjiyaneke azad û bidawîanîna çanda tundiyê pêkan e.”
Haystan Hesen di dawiya axaftina xwe de bang li jinan kir ku xwe bi rêxistin bikin û ji bo vegerandina mafên xwe û rola xwe ya xwezayî tê bikoşin.
Di civînê de nîqaş li ser kokên tundiyê, çawaniya guhertina zihniyeta baviksalar û zayendparêziyê hatin kirin û pêşniyar hat kirin ku bi armanca pêşxistina bingehên edalet û wekheviyê dewreyên perwerdeyê werin zêdekirin.
HELEB
Tevgera Hîlala Zêrîn a Çanda Jinan jî semînerek li ser tundiya li dijî jinan û rêbazên bidawîkirina wê li Navenda Çand û Hunerê ya Cemîl Horo ya li taxa Eşrefiyê ya Helebê da.
Rêvebera tevgerê Ronahî Henan semîner bi rêve bir behsa dîroka tundiya li dijî jinan kir. Ronahî destnîşan kir ku ev ne diyardeyeke nû ye, lê belê mîrateyeke çandî û dîrokî ye ku hevkariya resen a di navbera mirovan de veguheriye serdestiyê.
Ronahî di dewama axaftina xwe de got jidayikbûna mirovên nû, avakirina projeyên hevbeş û avakirina têkiliyên yekgirtî yên bê serdestî, pêdivî bi rakirina maskeya hêza derewîn û avakirina hevjiyaneke azad heye.
REQA
Meclisa Kombûna Jinan a Zenûbiya ya Kantona Reqayê jî bi heman armancê semînerek li hola Meclisa Giştî ya bajarokê Selhebiyê da. Endamên Meclisa Endelus, Partiya Sûriyeya Pêşerojê, şaredariyên Selhebiyê, Reşîd, Kedîran û Meclisa Qehtaniya amade bûn.
Endama Kombûna Jinan a Zenûbiya ya Kantona Reqayê Buseyna Ebdo bal kişand ser cureyên tundiya li ser jinan û got, tundî bi fîzîkî, devkî, derûnî, aborî, medyaya dîjîtal, zayendî, malbatî û civakî tê kirin. Buseyna diyar kir ku tundî di kesayeta jinan de mirovahiyê dike hedef û destnîşan kir ku azadiya jinan û pêşxistina wan rê li ber avakirina civakeke hevbeş û wekhev vedike.
Hevseroka Meclisa Rojava ya Kantona Reqayê Ebdulxefûr El Dêf jî behsa tundiya aborî kir û da zanîn ku ev cure tundî ne tenê bêparhiştina madî ye, lê qedexekirina azadiya jinan jî digire nava xwe û got: “Tundiya aborî ji sînorên takekesan derbas dibe û dibe diyardeyek kûr a civakî ku bandorê li aramiya malbat û tevahiya civakê dike. Ev cure tundî xizanî, bindestî û îstismarê diafirîne.”
Di dawiya semînerê de sînevîzyonek li ser tundiya li Sûriyeyê hat pêşandan.
GIRKÊ LEGÊ
Meclisa Jinan a PYD’ê di çarçoveya çalakiyên xwe yên bi vê boneyê de semînerek li hola Sendîqeya Karkeran a bajarokê Rimêlan ê kantona Cizîrê da. Endamên saziyên sivîl, Kongra Star û bi dehan şênî beşdarî semînerê bûn.
Piştî deqeyeke rêzgirtinê, endama Meclisa Jinan a PYD’ê Menal Mihemed bal kişand ser girîngiya têkoşîna li dijî tundiya li ser jina û diyar kir ku têkoşîna li dijî tundiya berpirsyariya herî kesî ye. Her wiha anî ziman ku azadiya jinan bingeha avakirina civaka demokratîk e.
Bi navê Meclisa Jinan a PYD’ê-şaxê Girkê Legê Netewî Xemgîn jî da zanîn tundiya li dijî jinan pirsgirêka herî mezin e û parastina jinan û pêşxistina wan mîsyoneke civakî ye. Her wiha bi bîr xist ku tevî ku jinn di civakê de rolên pêşeng dike û parastina civakê dike, lê gefa li ser jiyana wan û rola wan dewam dike.
Netewî Xemgîn da zanîn ku serxistina projeya neteweya demokratîk bi azadkirina jinan ve girêdayî ye.
Piştî semînerê dirûşmên “Jin, Jiyan, Azadî” hatin berzkirin.
TEBQA
Meclisa Kombûna Jinan a Zenûbiya ya Kantona Tebqayê bi beşdariya 60 mêran ên endamên Rêveberiya Xweser û komînan 2 dewreyên perwerdeyê vekir. Dewreyên perwerdeyê bi navê Şehîd Adar Harûn li Akademiya Kombûna Jinan a Zenûbiya û Meclisa Sivîl hat vekirin.
Dewreya perwerdeyê dê 10 rojan dewam bike. Di dewreyê dê wane li ser girîngiya perwerdeyê, rexne û rexnedayîn, dîroka jina, civaka xwezayî û têkoşîna li dijî tundiya li ser jinan werin dayîn.
Perwerde dê ji saet 09.00’an heya 14.00’an dewam bike. Di 26’ê Mijdarê de dê li bajarokê Hinêda heman dewre were vekirin.
Kombûna Jinan a Zenûbiya bi tevkariya tevgerên jinan, pankartên bi dirûşmên “Ji bo bidawîkirina tundiya bi hev re em civakeke demokratîk û komînal” li deriyên têketina bajarê Tebqayê, taxa Sanî, çerxerêya Elem, çerxerêya Şehîd Hebûn û nêzî Bendava Firatê daliqandin.
Meclisa Jinan a Partiya Sûriyeya Pêşerojê bi beşdariya endamên meclisê, Desteya Jinan, Partiya Sûriyeya Pêşerojê û hevserokên komînan semînerek li bajarê Meskena yê kantona Tebqayê da.
Endama Meclisa Partiya Sûriyeya Pêşerojê Fehîma El Elî semîner da û got, tundiya li dijî jinan ne tenê kiryarek takekesî ye, lê belê nîşaneya avahiyek civakî û çandî ye ku bindestiyê didomîne û pêşveçûna civakê asteng dike. Fehîmayê anî ziman ku têkoşîna li dijî tundiyê bi azadkirina hişmendiyê û xurtkirina têkiliyên li ser bingeha rêzgirtin û wekheviyê, sazkirina qanûnên ku edaletê bi pêş dixe, dest pê dike.
Desteya Jinan a Kantona Tebqayê bi heman mijarê semînerek li bajarê Dibsî da.
DÊRAZOR
Yekîtiya Jinên Ciwan û Kombûna Jinan a Zenûbiya 2 semîner li bajarê Hecînê yê Dêrazorê dan. Semîner bi beşdariya jinên bajarokê li ser qanûnên malbatê, têgehên cudekarî û tundiya civakî hate dayîn.
Endama Tevgera Ciwanên Şoreşer a Sûriyeyê Neda Îsmîal bendên qanûna malbatê şîrove kirin. Endama Kombûna Jinan a Zenûbiya Sefa El Mihemed jî diyar kir ku armanca van çalakiyan rêgirtina li ber tundiyê û pêşxistina çanda tevkariyê ji bo avakirina civakeke bêyî tundî ye.
Di semîneran de girîngiya bilindkirina asta hişmendî, piştgiriya qanûnên parastina mafên jinan hat vegotin.
SIRÎN
Di boneya 25’ê Mijdarê Roja Têkoşîna li Dijî Tundiya li ser Jinan, Kongra Star perwerdeya mêran bi tevlêbûna hevserok û endamên saziyên Rêveberiya Xweser li hola Navenda Sûriyeya Pêşerojê ya li bajarê Sirînê ê kantona Firatê da destpêkirin.
Di roja yekemîn a perwerde de li ser rêziknameyên Kongra Star hat dayîn û di roja duyemîn de wê li ser Qanûna Jinan û di roja sêyem de li ser dersa zîhniyet û tundiya li ser jinan dê were dayîn.
Di perwerdeyê de ders ji aliyê endama Kongra Star a Kantona Firatê Loceyn Selîm ve hate dayîn. Loceyn Selîm rêziknameya Kongra Star şîrove kir û wiha got: “Tevgerên jinan her roj ji bo xwe bikin roja bilindkirina têkoşîna li dijî tundiya li ser jinan û ji bo guhertin û veguhertinê her dem di nava kar û xebatê de bin.”
Loceyn Selîm diyar kir ku armanca rêziknameya Kongra Star divê her mêrek ji xwe re esas bigire û li gorî wê tev bigere û li dijî tundiya li ser jinan têbikoşe.
