Rêber Apo bi rêya Heyeta Îmraliyê ya berfirehkirî di 27’ê Sibatê de bi sernavê ‘Banga Aştî û Civaka Demokratîk’ daxuyaniyek dabû. Bi vê daxuyaniyê re hatibû ragihandin ku pêvajoyek hatiye destpêkirin û weke ‘Dawiya pêvajoya 52 salan û destpêka dema civaka demokratîk’ hatibû pênasekirin.
Ev banga Rêber Apo ne tenê ji bo Kurdistan û Tirkiyeyê her wiha ji bo çarenûsa herêmê bi temamî destpêka pêvajoyeke nû bû.
Ji bo vê ‘Banga sedsalê’ ku li cîhanê deng veda, Tevgera Azadiyê ya Kurd agirbest ragihand û diyar kir ku wê ya pêwîst bike. PKK’ê di daxuyaniya xwe ya 1’ê Adara 2025’an de gotibû, “Ji bo ‘Banga Aştî û Civaka Demokratîk’ a Rêber Apo bikeve meriyetê, ji îro û pê ve em agirbestê radigihînin. Rastiyên şênber bi rengekî eşkere radixin pêş çavan ku ji bo ‘Banga Aştî û Civaka Demokratîk’ bi serketî bi cih bê, li ser bingeha çareseriya demokratîk a pirsgirêka Kurd ji bo Tirkiye û Rojhilata Navîn demokratîk bibe, ji bo pêşî li pêşketina tevgera demokrasiyê ya navneteweyî bê vekirin divê Rêber Apo bi rengekî fîzîkî azad be, xwedî şert û mercên kar be û hevalên xwe jî di nav de karibe bêyî astengî bi her kesî re têkiliyê dîne. Em hêvî dikin ku saziyên pêwendîdar ên dewletê wê pêwîstiyên van hemûyan bi cih bînin.”
Piştre jî Hêza Parastina Gel (HPG) daxuyaniyek da çapemeniyê û diyar kir ku wê li gorî agirbestê tevbigere.
Di daxuyaniyê de hate gotin, “Di çarçoveya banga dîrokî ya Rêber Apo de biryara agirbestê ya partiya me PKK’ê ji 1’ê Adara 2025’an û pê ve ji bo hemû hêzên me derbasdar e. Hemû fermandarî û yekîneyên me yên pêwendîdar divê bi hesasiyeteke mezin li gorî biryara agirbestê ya partiya me tevbigerin û vê biryarê bi temamî bi cih bînin.
Bêguman li hemberî êrîşan jî hêzên me wê di çarçoveya mafê rewa û xweparastinê de bersiva pêwîst bidin ku ev yek jî mafekî bingehîn e. Li hemberî êrîşên hertimî, hêzên me xwedÎ mafê bersivdayinê ne.”
Baş e li pêşberî gerîla yên ku ji 1’ê Adarê û pê ve ketin pozîsyona agirbestê, nêzîkatiya dewleta Tirk çi bû? Em li rewşê binihêrin.
Dewleta Tirk berevajî çareseriya vê pirsgirêkê kete pozîsyoneke welê ku weke şer dixwaze. Li hemberî gerîla bi bangên ‘Werin teslîm bibin’ polîtîkaya înkar û îmhayê dewam kir, êrîşên xwe hîn jî dewam dike.
ISRARA ARTÊŞA TIRK A DI ŞER DE DEWAM DIKE
Artêşa Tirk a dagirker meha Adarê 11 caran bi çekên kîmyewî, 9 caran bi çekên qedexekirî û 9 caran jî bi droneyên bombebarkirî êrîş bir ser tunelên şer ên li Herêmên Parastinê yên Medyayê.
Di heman demê de qadên berxwedanê 169 carna bi balafirên şer, 98 caran bi helîkopterên êrîşê û 11 hezar û 289 caran bi çekên giran, top û obusan bombebaran kir. Gerîla jî li hemberî dagirkerên ku di pozîsyona êrîşê de bûn 13 caran destwerdan kirin.
Desthilatdariya AKP’ê ku xwest pozîsyona agirbestê ya gerîla ji xwe re bike firsend, meha Nîsanê jî di şer de israr kir.
Artêşa Tirk a dagirker meha Nîsanê 7 caran çekên kîmyewî bi kar anî. 76 caran bi balafirên şer, 12 caran bi helîkopterên êrîşê, 2 caran bi droneyên bombebarkirî û 9 hezar û 693 caran bi çekên giran, top û obusan êrîş kir. Şervanên azadiyê jî 17 caran dest li artêşa Tirk a dagirker werdan ku di pozîsyona êrîşê de bû.
ARTÊŞA TIRK 20 HEZAR Û 982 CARAN ÊRÎŞ KIR
Li hemberî gerîla ku di pozîsyona agirbestê de ye, artêşa Tirk a dagirker di nava 2 mehan de bi giştî 20 hezar û 982 caran êrîş kir.
Di êrîşên hewayî yên artêşa Tirk a dagirker ên bi SÎHA de li Garê 2 gerîla şehîd bûn. Her wiha meha Nîsanê ji aliyê Navenda Ragihandinê ya HPG’ê ve nasnameya 2 gerîlayên jin hate eşkerekirin ku bi çekên kîmyewî şehîd hatin xistin.
Di daxuyaniyê de hate gotin, “Artêşa Tirk a dagirker di 11’ê Nîsanê de êrîşî çeperên me yên şer ên li Herêma Şehîd Delîl a Rojavaya Zapê kir û hevrêyên me Besê û Mîtra yên ku bi fedaî li ber xwe dan û rê nedan dagirkeran, şehîd bûn.”
GERÎLA DI POZÎSYONA AGIRBESTÊ DE YE
Artêşa Tirk pozîsyona agirbestê weke lawaziyekê şîrove dike, hewl dide vê yekê di organên xwe yên medyayê de bi vî rengî nîşan bide û konsepteke tasfiyeyê ya nû ferz bike.
Ji ber ku dewleta Tirk hîn dest ji şer bernedaye. Her roj li Herêmên Parastinê yên Medyayê balafirên şer û kefşê digerîne û bombeyan dibarîne. Bi obus, tank, top an jî çekên kîmyewî û qedexekirî êrîşî çeper û tunelên berxwedanê dike. Gerîla jî li gel van êrîşan hemûyan di pozîsyona agirbestê de ye.
