Partiya Demokrasî û Wekheviyê ya Gelan (DEM Partî) di 6-7’ê Kanûnê de bi beşdariya gelek siyasetmedar û akademîsyenên pispor li Stenbolê “Konferansa Aştî û Civaka Demokratîk a Navneteweyî” li dar xist. Di konferansa du rojan berdewam kir de encam û çavdêriyên girîng derketin holê. Beşdarên konferansê daxwaza azadiya fîzîkî ya Rêber Apo kirin.
Beşdaran diyar kirin ku pêvajoya hatiye destpêkirin hem ji bo cîhanê û hem jî ji bo Rojhilata Navîn wê baş be, bal kişandin ser girîngiya avêtina gavan û her wiha li ser sosyalîzm û Marksîzmê nîqaşên kûr meşandin.
Şandeyek ku beşdarî konferansê bû piştre çûn Amedê. Şande bi rêxistinên jinan û şaredariyê re hevdîtin pêk anî, serdana cihên dîrokî Sûr û Girê Mirazan kir.
‘BI HEVGIRTINEKE DÎROKÎ BEŞDARÎ KONFERANSÊ BÛM’
Endamê şandeyê yê ji Herêma Xweser a Baskê, senator Josu Estarrona Elizondo çavdêriyên xwe yên li ser konferansê û pêvajoyê bi ajansa me re parve kir.
Josu Estarrona diyar kir ku sedema sereke ya beşdarbûna wan a konferansê hevgirtina dîrokî ya Herêma Baskê û EH Bildu ya bi têkoşîna gelê Kurd re bû.
Estarrona bi bîr xist ku Herêma Baskê li du dewletan û saziyên cuda ve hatiye parvekirin, Estarrona anî ziman ku ew neteweyeke bê dewlet in û got, “Welatê me ji sedsala 16’an vir ve hatiye parçekirin û ji wê demê ve her nifş pevçûn û dijberî jiyan e.”
Josu Estarrona çavdêriyên xwe yên li ser konferansê anî ziman û destnîşan kir ku gelê Kurd ketiye rêyek ber bi aştiyê ve û bi xurtî bawer dike ku ev pêvajoyek bêveger e. Estarrona diyar kir ku aliyê herî girîng ê konferansê ew e ku ji ezmûnên navneteweyî dersê derxe.
Estarrona diyar kir ku stratejiya çepgirên welatparêz xwe dispêre du lingên sereke û vê yekê weke “misogerkirina piştgirî û hevkariya civaka navneteweyî” rave kir. Estarrona got ku baweriya wî bi pêvajoya azadiyê ya bêçek heye.
‘LÎDER NAYÊN TECRÎDKIRIN’
Estarrona destnîşan kir ku hin beşên dewletê bi girtina rêberên siyasî û dûrxistina wan a ji jiyana siyasî armanc dikin ku gavêb ji bo aştiyê asteng bikin. “Estarrona wiha domand: “Kadroyên lîder divê bikaribin bi civakê re têkilî daynin, rewşa ruhî yê mirovan fam bikin, nêzîkatiyek pedagojîk pêş bixin û bi kesên ku îkna nebûne re nîqaş bikin. Tecrîdkirina lîder dê di pêşerojê de rê li ber pirsgirêkên nû veke.”
‘AŞTÎ Û DEMOKRASÎ JI BO HER KESÎ HÊJA NE’
Estarrona anî ziman ku çareserkirina pirsgirêkên siyasî, çi Bask be çi Kurd be, divê di çarçoveyek qanûnî de bimeşe û got, “Ev nêzîkatî wê avahiyên dewletê demokratîk, bi tendurist, bilez û serketî bike. Divê em ji ezmûnên berê yên di pêvajoyên aştiyê de dersan derxin. Aştî û demokrasî ji bo her kesî hêja ne û esase ku ew li gorî qanûn û normên navneteweyî pêşve biçe. Aştî û lihevhatin ji bo berjewendiya her kesî ye.”
‘BANGA 27’Ê SIBATÊ DI QADA KUREVÎ DE XWEDÎ GIRÎNGIYEKE MEZIN E’
Estarrona wiha domand: “Banga 27’ê Sibatê ya Rêber Abdullah Ocalan ji bo Rojhilata Navîn û siyaseta cîhanî xwedî girîngiyek mezin e. Paradîgmaya ku ji hêla Ocalan ve hatiye pêşkêşkirin, ji bo çareserkirina pirsgirêkên siyasî û civakî yên li herêmê xalek destpêkê ye. Ez bawer dikim ku bang û ramanên Rêber Ocalan xwedî hêza ku wê zîhniyeta faşîzan derbas bike. Rêberek rastîn xwedî kapasîteya pêkanîna guhertina stratejîk e.”
‘DIVÊ OCALAN AZAD BIBE’
Estarrona anî ziman ku azadiya Rêber Apo misogeriya pêvajoyê ye û wiha bi dawî kir: “Divê ramanên wî bi awayekî xurt di nav civakê de were entegrekirin. Gel hewceyî bi modernîteya demokratîk û jiyana bi hev re ya xwe dispêre fikra neteweya demokratîk dibînin. Li Kurdistaneke azad rêya gihîştina civatek aştîxwaz û demokratîk di vir de derbas dibe.”
