Girtiyên Apoyî yên ku li girtîgehên Kurdistan û Tirkiyeyê, têkildarî êrîşên HTŞ û komên çete yên bi piştgiriya tirkiyeyê li ser Bakur û Rojhilatê Sûriyeyê û Helebê daxuyaniyek dan.
Di daxuyaniyê de ev îfade hatin bikaranîn: “Bi rojan e li Heleb, Dêr Hafir û Tişrînê li dijî gelê me komkujî tên kirin, lê nûnerên pergala navneteweyî û maşeyên wê yên herêmî yanî dewlet-netew bi zanebûn xwe kerr, kor û lal dikin. Dezgehên medyayê yên ku wekî organên şerê psîkolojîk tevdigerin, bi manîpulekirina dorpêçkirin û qetilkirina sivîlan a li malên wan, rê li ber komkujiyan vedikin; jin û zarokên hatine qetilkirin wekî ‘terorîst’ û ‘parçeker’ nîşan didin. Lê belê, em berpirsên rastîn ên van komkujiyan û armancên wan ên qirêj pir baş nas dikin. Armanca sereke ya van êrîşan Şoreşa Rojava ye; destkeftiyên neteweya demokratîk in ku gelan li ser bingeha azadî û wekheviyê bi dest xistine.
‘DAÎŞ DI BI NAVÊ HTŞ’Ê DE TÊ REWAKIRIN’
Bi kurtasî; li Rojava xeta îdeolojîk, polîtîk û felsefî ya Rêber Apo tê hedefgirtin. Dibe ku tetîkkêşiya van êrîşan DAIŞ’a bi cilên HTŞ’ê û komên berhevkirî yên ji wê xetê tên bikin. Lê em dizanin ku li pişt wan TC, Siûdî û Qatar hene. Ev hêz in ên ku van keriyên kujer perwerde dikin, xwedî dikin û bi hovîtî berdidin ser sivîlan. Ev koma çete ya paşmayiya DAIŞ’ê hem li qadê tê bikaranîn hem jî di bin navê HTŞ’ê de di asta navneteweyî de tê rewakirin. Lê em wan rûyên li pişt maskeyên bi rî û qirêj baş nas dikin. Ew berê li Parîsê, li Roboskî, li Efrîn û Kobanê bûn. Kevneşopiya têkoşînê ya 50 salî şiyana dîtina tiştên li pişt perdeyê daye me.
EM Ê MAFÊ XWE YÊ BERXWEDANA DEMOKRATÎK BI KAR BÎNIN
Wekî Komunîstên Apoyî yên ku di zindanan de wekî dîl tên girtin, em komkujiyên li Rojava li dijî gelê me û pêkhateyên neteweya demokratîk tên kirin şermezar û lanet dikin. Em dixwazin bi zelalî diyar bikin ku em bi esasên xeta civaka demokratîk a Rêber Apo ve girêdayî ne û di her şertî de em ê li dijî êrîşan mafê xwe yê berxwedana demokratîk bi kar bînin. Em sondxwarî ne ku nirxên di dîroka têkoşîna 50 salî de, li ser xeta berxwedana zindanê ya Mazlum, Hayrî û Kemalan û kevneşopiya fedaî ya şehîdên me hatine afirandin, biparêzin. Em bang li hemû hêzên çete û xwediyên wan dikin: Heke ev êrîş ranewestin û pêvajoya bi însiyatîfa Rêber Apo pêş ketiye were sabotekirin, helwesta me wê bigihîje astên pir pêşketî û şênber. Di encamên neyînî de ne em, lê hêzên li pişt van çeteyan berpirsiyar in.
BANGA BILINDKIRINA TÊKOŞÎNÊ
Hêzên navneteweyî yên ku dixwazin çeteyên DAIŞ’ê bi qat û qiravêtan bikin serê dewleta Sûriyeyê, di lêgerîna nûkirina komploya navneteweyî de ne. Çawa ku me bi fedaîtî Kobanê azad kir, îro jî em amade ne vê yekê li hemû axa Rojava dubare bikin. Ji bo Rojava ya ku Rêber Apo tovên têkoşînê lê reşandine û şoreşa jinê lê bi ser ketiye; îro roja rûmet û şerefê ye. Sibê dibe ku pir dereng be. Em wekî girtiyên Apoyî bang li malbatên xwe, gelê xwe û ciwanan dikin ku bi ruhê seferberiyê dakevin qadan û têkoşînê bilind bikin. Divê her mirovê şoreşger, demokrat û welatparêz li dijî van êrîşan helwest bigire. Ev erkeke mirovahiyê ye. Em hemû hevalên xwe yên berxwedêr û gelê xwe yê welatparêz silav dikin. Bijî Şoreşa me ya Rojava, bijî Rêber Apo”
