Endama Rêveberiya Yekîtiya Êzîdiyan a Sûriyeyê Suad Hiso di despêka axaftina xwe de nerazîbûna xwe ya li ser Hikûmeta nû ya Sûriyeyê nîşan da û wiha got, ‘”Îro li Sûriyeyê hemû kesên wekî Hatim Ebû Şeqra û Ebû Emşa ku di rêveberiya wê de cih digirin, kujerên jinan in. Her wiha ji bûyerên dawî, yanî bi êrîşên li ser Elewiyan jî xuya dike ki di rêveberiya nû de tu mafê pêkhateyên din ên civakî nîne.“
Suad Hiso di dewama axaftina xwe de anî ziman ku kujerê Şehîd Hevrîn Xelefê di rêveberiya Sûriyeyê de cih digire û wiha domand, “Li şûna ku ew û kesên pê re li dadgehên navnetewî werin darizandin û hesab ji wan bê pirsîn, kujerê Şehîd Hevrîn Xelefê ‘”Hatim Ebû Şeqra’” îro li Sûriyeyê xwe weke rêveber pêşkêş dike. Destê wî û bi dehan kesên wek wî di talankirin, qirkirin, dizî û kuştinê de heye. Loma em dibînin ku di cihekî wiha de cihê pêkhateyên dîtir, helwesta wan û tu projeyên wan tune ye.”
Endama Rêveberiya Yekîtiya Êzidiyan Suad Hiso di dawiya axaftina xwe de diyar kir ku Desthilata Şamê ya nû nayê qebûlkirin û got, “Em ê weke pêkhateyên Bakur û Rojhilatê Sûriyeyê destê xwe bidin destê hev û em ê li pêşiya projeya desthilata Şamê bisekinin. Çinku em xwedî proje ne û di herêmên Bakur û Rohilatê Sûriyeyê de me mafê xwe, çand û zimanê xwe parastiye û em dikarin di Sûriyeya nû de jî van mafên xwe pêk bînin.”
Çalakvan û Endama Meclîsa jinên Sûriyeyê ya Bakur û Rojhilatê Sûriyeyê Ebîr Esom li ser rewş û kiryarên HTŞ’ê yên li Sûriyeyê axivî û got, “HTŞ bi fikra xwe ya îslamîst û radîkal li tevahiya Sûriyeyê bi kiryarên xwe belav bû. Her wiha bi xwe re têgehên nû jî anîn; bi taybet jî li ser jinan. Ji destpêka hatina wan û heta niha gelek kiryar, daxuyanî û biryar li ser jinan girtin; weke derxistina jinan ji qada karkirinê. Yanî hemû hewlên wan ji bo paşdevegerandina jinan tên dayîn.”
Ebîr Esom wiha domand, “Di 14 salan de li Sûriyeyê kar û xebateke mezin ji aliyê jinan ve hate kirin. Jinên Sûriyeyê di roja îro de ne jinên berî 14 salan in, ji ber ku di jinan li Sûriyeyê û bi taybet jî li Herêmên Bakur û Rojhilatê Sûriyeyê serhildan û xebateke mezin pêk anîn. Lê nêzîkatiyên desthilata îro ya Sûriyeyê ya li hember jinan tê wateya paşguhkirina rewşa jinan û rola wan a di pêşeroja Sûriyeyê de. Ji bo wê ev ê bi xwe re krîza Sûriyeyê kûrtir bike”
Çalakvan û Endama Meclîsa jinên Sûrî a Bakur û Rojhilatê Sûriyê Ebîr Esom da eşkerekirin ku çi warî de dibe bila bile heta ku pirsgirêkek hebe wê krîz berdewam bike û got “Şoreşa Sûriyeyê di despêkê de doza rûmet, mafê jinan û mirovahiyê û pêkhateyan dikir. Loma divê li gor vê tevbigere û pirsgirêkên heyî çareser bike. Ji bo wê divê hebûn, maf û rola jinan li Sûriyeyê xurtir bibe da ku em bigihêjin Sûriyeyeke demokrat, pir reng ku tê de her kes bi rola xwe radibe.”
