Jinên parêzer bi daxuyaniyekê, li Şamê hebûna serçeteyên ku gelê Sûriyeyê qetil kirin û koçber kirine, şermezar kir.
Daxuyanî li Parka Mişwar a li bajarê Hesekê ji aliyê endama Nivîsgeha Jinan a Bakur û Rojhilatê Sûriyeyê Henan Reşko ve hat xwendin.
Di daxuyaniyê de hebûna sûcdarên şer di qada siyasî û leşkerî ya desthilata Şamê de hat şermezarkirin. Bang hat kirin ku divê li gorî qanûnên navneteweyî hesab ji çi kesên destê wan di rijandina xwîna sivîlan de heye, were pirsîn.
Di daxuyaniyê de îşaret bi serçeteyê koma “Ehrar El Şerqiye” Ehmed Îhsan Feyad El Hayîs (Ebû Hatim El Şerqa) hat kirin ku di 12’ê Cotmeha 2019’an sekretra giştî ya Partiya Sûriyeya Pêşerojê Hevîn Xelef û ajokarê erebeya wê qetil kiribûn. Hate gotin, ev sûc di qanûnên navneteweyî de sûcê şer e û wiha hat domandin: “Ji dema pêkanîna vî sûcî ve bangên navneteweyî yên hesabpirsîna ji sûcdaran dewam dikin, lê sûcdar heya niha derveyî çarçoveya edaletê ne û dixwazin di qada siyasî û leşkerî ya Sûriyeyê de cih bigirin.”
Li gorî daxuyaniyê; hebûna serçeteyan di proseya siyasî de xetereyê li ser siberoja Sûriyeyê çêdike û bê ceza hiştina wan, dihêle ku sûcan bidomînin.
Di daxuyaniyê de ev bangewazî hatin kirin:
– Kesên ku sûcên şer kirine, ji proseya siyasî, leşkerî ya siberoja Sûriyeyê werin dûrxistin, ji ber ku hebûna wan derfetên pêkanîna aştî û istiqrarê lawaz dike.
– Li dijî kesên ku sûc kirine lêpirsîneke serbixwe ya navneteweyî were vekirin û hesab ji wan were pirsîn.
– Malbata şehîd Hevrîn Xelef jî di nav de divê edalet ji qurbaniyan re were pêkanîn û sûcdar li dadgehan werin darizandin.
– Divê sûcdar ji cezayan nefilitin, hesabpirsîna ji wan şertê bingehîn ê aştiyeke mayînde li Sûriyeyê ye.
– Bêyî hesabpirsînê ne mimkun e edalet pêk were.
‘DIVÊ RÊXISTINÊN MAFÊN MIROVAN BERPIRSYARIYA XWE BI CIH BÎNIN’
Meclîsa Edaleta Civakî ya Kantona Firatê jî bi daxuyaniyekê hebûna kujerên Hevrîn Xelef di kongreya li Şamê de, şermezar kir.
Daxuyanî li ber avahiya meclîsê ya li bajarê Kobanê bi amadebûna bi dehan hiqûqnas, endamên Meclîsa Edaletê Jinan û Meclîsa Edaleta Civakî hat xwendin. Endama Dîwana Edaletê Civakê Felek daxuyanî xwend. Di daxuyaniyê de bang li rêxistinên mafên mirovan hat kirin ku berpirsyariyên xwe bi cih bînin û hesab ji çete Hatim Ebû Şeqra re bixwazin.
Di dawiya daxuyaniyê de ev peyam hat dayîn: “Em ê hemû hewldanên xwe bikin heya peyama aştiyê ya şehîd Hevrîn Xelef li tevahî erdnîgariya Sûriyeyê belav bikin.”
