Li Şengalê ji bo pîrozkirina 4’ê Nîsanê, rojbûna Rêber Apo plansaziyeke berfireh a çalakiyan hatiye derxistin. Li gel Tevgera Azadiya Jinên Êzidî (TAJÊ), Saziya Ziman û Perwerdehî û Şaredariyên Gel jî îsal bi pêşengiya çalakiyan rabûne. Jinên Êzidî bi wesîleya 4’ê Nîsanê careke din balê kişandin ser bandora fikrê Rêber Apo ya li ser jinên Êzidî û daxwaza azadiya wî ya fîzîkî kirin.
‘RÊBER APO JIN JI QIRKIRINÊ RIZGAR DIKE’
Hevseroka Meclîsa Gel a Şengalê Emşê Korkorkî anî ziman ku ev 11 sal in civaka Êzidî, jinên Êzidî li ser fikr û felsefeya Rêber Apo têkoşînê didin û wiha axivî: ‘’Rêber Apo daxwaza azadiya jinê dike, daxwaza mafên wan dike. Rêber Apo hewl dide jin ji qirkirinê rizgar bike, jiyana wê aram bike û bigihîne azadiyê. Divê em jî daxwaza azadiya Rêber Apo bikin. Azadiya wî azadiya hemû gelên bindest e. Rêber Apo dixwaze hemû gelên bindest axa xwe, civaka xwe azad bikin. Me jî li ser fikrê Rêber Apo axa xwe azad kir, em jî dixwazin Rêber Apo azad bibe.’’
‘RÊBER APO JI BO JINAN MAMOSTEYÊ MEZIN E’
Endama TAJÊ ya Dîgurê Rihan Xidir jî got, beriya ku civaka Êzidî fikrê Rêber Apo nas bike, azadiya jinê nebû û axaftina xwe wiha berdewam kir: ‘’Di fermanê de me fikrê Rêber Apo naskir, azadiya jinê wisa pêş ket. Çavê jinê vebû, jin dikare bipeyive, dikare li hemû sazî dezgehan cihê xwe bigire. Em destxweşî li mamosteyê xwe yê mezin Rêber Apo dikin. Rêber Apo di axaftinên xwe de xwe weke hevalê jinê tîne ser ziman. Eger jin azad be wê civak jî azad be. Ji ber ku destpêkê jinê parçe dikin pey re civakê. Di fermana 2014’an de jî êrîşê jinê kirin û xwestin civak tine bikin.’’
‘XWESTEKA RÊBER APO YE KU WERE ÇIYAYÊ ŞENGALÊ’
Endama Meclîsa TAJÊ ya Xanesorê Nûrê Şengalî anî ziman ku jinên Êzidî daxwaza azadiya fîzîkî ya Rêber Apo dikin û wiha got: ‘’Em dixwazin ji zindanê derkeve û were nav civaka Êzidî, xwesteka wî bû ku rojek were Çiyayê Şengalê. Şagirtên Rêber Apo Şengal azad kirin, her wiha jina bindest azad kirin. Jinên Êzidî bi fikrê Rêber Apo rabûn ser xwe, ji bin destê mêr û dijmin xwe rizgar kir.’’
