Li Kongreya Awarte ya 12’emîn a PKK’ê ku biryara fesixkirina avahiya rêxistinî ya PKK’ê û bidawîkirina têkoşîna çekdarî hate wergirtin, Mûrat Karayilan axivî û anî ziman ku wê vê pêvajoya krîtîk bi Rêber Apo re bi ser bixînin.
Karayilan diyar kir ku wan ji tecrûbeyên salên 2002-2004’an ders wergirtine, kes nikare PKK’ê dorpêç bike, bifetisîne. Karayilan got, eger dewleta Tirk di tundiyê de israr bike ew ê jî bi zimanê ku jê fêhm dikin bersiva pêwîst bidin.
Nirxandina Mûrat Karayilan bi vî rengî ye:
“Tiştek baş ew e ku di vê qonaxa krîtîk de yekdestî heye. Li vir me ji tecrubeyên berê yên sala 2002, 2004 û wan deman ders girt. Yanî tevî kêmahiyan jî nêzbûneke li gor xeta Rêber Apo heye. Di serdema nû de jî ez dixwazim fêm bikin hîn, yanî ez hinekê hestiyar im. Ji ber ku me pir berdêl dane, em çawa di vê qonaxa krîtîk de bi ser bikevin, ev fikaran zêde bi min re çedike. Ez bawer dikim ronahiya xeta Rêber Apo wê me bi ser bixîne. Ez dibînim ku Rêber Apo pir bi moral, pir bi biryar bi ser de diçe, wê demê temam e. Di her kêliya têkoşîna me de ez dizanim ku eger Rêber Apo di mijarekî de ne mîsoger be, tevnagere. Wê demê mîsoger e. Vaye em ji vê bawer dikin. Ji bo dewleta Tirk em nikarin qala baweriyê bikin, pratîka dewleta Tirk diyar e. Lê em heya dawî ji rê û rêbazê Rêber Apo bawer dikin.
KES NIKARE ME DORPÊÇ BIKE Û BIFETISÎNE
Ya yekemîn rewşa konjonkturel e, li Rojhilata Navîn, li ser xaka Kurdistanê şerekî çekdarî dimeşe. Çima? Hevalan jî vaye got. Serokatî ragihand. Ji ber ku şerê cîhanê yê sêyem li herêmê heye. Navenda vî şerî di cewherê xwe de Kurdistan e. Li ser xaka Kurdistanê yek hêzeke weke PKK’ê ku ewqas sal xwe îspat kir û şer kir, kesên pê re eleqe çêbikin û destekê bidinê heye. Mecalê vê yekê heye. Yanî kes nikare me dorpêç bike, bixeniqîne û ji holê rake.
EM JI RÊBER APO Û DOKTRÎNA XWE YA ŞER BAWER DIKIN
Ya duyem, di meha Çileya vê salê de civîna konseya fermandariyê çêbû, 9 rojan dewam kir. Di vê civînê de em gihiştin biryarek û doktrînekê. Ez bawerim haya we hemûyan jê heye. Ev doktrîn ne tişteki ji rêzê ye. Li gorî perspektifa Rêber Apo şerê gel ê şoreşgerî tecrubeya me ya 41 salan hatiye ziman. Ez bawer dikim ku em ê bi vê doktrînê bi ser bikevin. Li kêleka vê helbet em hîn zêdetir ji Rêber Apo bawer dikin. Bi vê pêngava ku Rêber Apo pêş xistî, em hîn zêdetir bawer dikin. Lê eger em mecbûr bimînin, em bi doktrîna şerê nû yê me amadekirî jî bawer dikin, ev wê me bibe encamê. Bi rastî jî em dereng dimînin. Lê dereng jî be, hêzeke me heye, asteke me heye. Şer êdî wisa tenê bi hejmar nabe. Şer bi nîtelîk, taktîk û teknîkê dibe. Evane cem me hene. Di PKK û gerîlayên azadiya Kurdistanê de ev yek heye.
EGER DI TUNDIYÊ DE ISRAR BIKIN EM Ê ZANIBIN KU BI ZIMANÊ JÊ FÊHM DIKIN BERSIVÊ BIDIN
Di taktîk vekirina şerê tunel û şerê tîm ê çêbûyî de em pispor in. 5 sal in hevalên me dimeşînin, pisporbûn heye, heya em fêr bûn me pir windahî dan. Yanî ev ecemetiya me ya li Avaşînê, Mamreşo, Girê Sor; yanî ji wan deman em îro gihiştine astekê. Tecrube bi me re çêbû.
Ya din, di hêzên me de niha ruhê fedayî û Apogeriyê hîn xurttir e. Ne tenê hin hevalên fedayî û hêzên taybet wisa diçin çalakî dikin; wek heval Rûken û Sarya, Rojhat û Erdal, Asya û Rojger, yanî ne tenê ev. Her hevalên li qada şer fedayî ne. Çalakiya ku şehîd Bager Gever û Avzem bi çar hevalan re pêk anî, biryara fedayîbûnê ye. Şerzan û Arîn jî bi wan re bûn, 4 heval. Ew ruh heye. Ruh bilind bûye. Di Fermandariyê de em dikarin nimûneya Gabar Botan nîşan bidin, Fermandarê Berxwedana Kelha Şehîd Mûnzûr. Yanî taktîk û teknîk bi hev re karanîn, dijmin şopandin li gor wê taktîk pêşxistin, yanî ev ast di hevalan de çêbûye.
PKK ne tenê gerîla ye. PKK gel e, bi milyonan e. PKK niha di serdema xwe ya herî xurt de ye. Xalek din jî ez diyar bikim. Dijmin bi teknîkên hewayî, bi hevsengî di rewşa xwe de xurt kir. Lê di dema nû de hem ji bo vale derxistina tarz, teknîk û îstixbara dijmin astek çêbû bi me re, hem jî astekî teknîk pêş ket. Mesela, xistina balafirên keşfê, li gorî em dizanin li herêmê Îran, Tirkiye, Îsraîl dikarin bixînin, yê 4’an jî em in. Li herêmê ewqas dewlet hene, nikarin. Meseleya, gelo kî ew daye, kî nedaye, ne rast e. Em gihiştine asteke ku bikaribin teknolojiya serdemê bixwînin, aqlê çêkirî bixin bin xizmeta şer de. Keç û xortên Kurd ên Apoyî, ruhê Apogeriyê ne tenê di fedayîbûnê de di afirêneriyê de jî îro gihiştiye astekê. Êdî dikarin teknîka serdemê pêş bixin. Ev jî heqîqetek e. Di sala dawî de ji bo şerê dronan, dronên cur be cur ku mirov bikare li hedefên dûr bixe, astek hatiye bidestxistin. Evane hemû di nuqteya dawî de pêk hatine. Ev helbet cihê rexneyê ye. Beriya 2 salan me ji hevalên eleqeder re wisa nivîsand; ‘heval, piştî em hemû şehîd bikevin, hûnê wê demê teknîkê pêş bixin?’ Ji ber ku her dereng dima. Lê niha ev derfet heye. Berê şerê binerd tune bû li cem me. Me li ser erdê şer dikir. Berê şerkirina fedayiyane ya bi tîmên pispor ya bi vî ruh û têgihiştinê tunebû. Berê teknîka hewayî tunebû û em dikarin hîn zêdetir pêş bixin. Berê di hêzên me de di vê astê de tecrube çênebûbû, niha ew jî heye. Ji bo wê em dikarin di serdema nû de li gorî demê nû şerê gerîla yê sedsala 21’an pêş bixin. Em girêdayî xet û perspektîfên Rêber Apo ne. Em ê xeta Rêber Apo pêk bînin, ev kongre dê vê biryarê bide. Lê belê, eger dewleta Tirk tevî vê yekê jî neyê rê û di tundiyê de israr bike, wê çaxê ew zimanê ku ew jê fêm bikin em dikarîn pê bersiva pêwîst bidin, divê her kes vê bizane.”
