Di daxuyaniya Hevserokatiya Konseya Rêveber a KCK’ê de ev tişt hatin gotin:
“Welatparêzê me yê bi nirx û yek ji kesayetên bingehîn ên têkoşîna me, ap, bira, hevrê û çinarê têkoşîna me yê 90 salî, jiyana xwe ji dest da. Em ji bo malbat, cîran, hevrê û hemû gelê Kurdistanê sersaxiyê dixwazin.
Îsmaîl Agaç, milîtanekî welatparêz bû ku li Hîlwanê ku bingehên xurt ên têkoşîna me lê hatibûn danîn, di têkoşîna gel û azadiyê de cih girt. Îsmaîl Agaç ku ji hewirdoreke gelek xizan dihat, serî li ber zilma axa û began neditewand û xwedî kesayetek serhildêr bû. Li dijî pergala axatî û zilmê mîna volkanê bû. Li Hîlwanê yek ji welatparêzên ewil e ku deriyê xwe ji milîtanên Apoyî yên ku li dijî zilma axa û began têkoşîn didan, vekir. Mala xwe û ya tevahî malbatê ji milîtanên Apoyî re vekir. Mala wî ji bo Apoyiyan bibû weke navend. Dema ku hêzên li Hîlwanê êrîşê taxa ku lê dima kirin, ew bi mêrxasiyeke xurt û bêdudilî li ber zordariya axayan rabûye û bi demançeya xwe bersiv da. Bi vê helwesta xwe cesareteke mezin daye milîtanên Apoyî jî. Ger ku milîtanên Apoyî li dijî axa û begên li Rihayê ku piştgirî didin dewletê li ber xwe dabin, yek ji nirxên herî mezin ên vê berxwedanê Îsmaîl Agaç e. Tevahiya gelê Rihayê, bi taybetî yên li Hîlwanê dijîn welatparêzî û mêrxasiya Îsmaîl Agaç baş dizanin.
Hevrê Îsmaîl gelek dihat hezkirin û ji ber vê milîtanên Apoyî wî her tim bi minetdarî û heyraniyek mezin bibîr anîne.
Piştî derbeya leşkerî ya 12’ê Îlonê hemû malbatê zilm û êşkenceya dewletê dît. Koçî derdora Mêrsîn û Edeneyê kir. Apê me Îsmaîl û Dayê Aynzelxa di têkoşîna azadiya Kurd de sê ewladên xwe şehîd dane. Kurekî wî û du neviyên wî hê jî di nava têkoşîna azadiya Kurd de têkoşîna xwe dimeşînin.
Welatparêzên Kurdistana mezin tim û tim bi têkoşîna ewlad û neviyên Îsmaîl Agaç serbilind bûne. Girêdayî dilsoziya ji şehîdan re, jiyan û têkoşîna domandiye. Layiqbûna ji şehîdan re bû sereketirîn armanca wî. Di gel ku bi awayekî maddî yek ji xizantirîn mirovê cîhanê jî bû bi awayekî manewî kesê herî bi hêz û dewlemend bû. Bidestxistina hezkirina gel a zêde ji bo wî nirx û dewlemendiya herî mezin bû.
Ev welatparêzê mezin wê di dîroka azad a Kurdistanê de tim were bibîranîn. Jiyana azad û demokratîk a gelê Kurd wê li ser têkoşîna welatparêzên bi vî rengî hebûna xwe bidomîne. Welatparêzên mînak, bavê mînak, dayika mînak ew in.
Em Apê xwe Îsmaîl û hevrêyê xwe bi rêzdarî bi bîr tînin û dibêjin wê hesret û xeyalên wî werin pêkanaîn û em ê layiqî wan bin.
Roman, sînema û şanoya vê malbatê jî dikarin werin nivîsandin û çêkirin. Dayîna hestên wan a bi rêya hunerê wê pîvanên azadî û demokrasiyê yên welatparêziya li Kurdistanê gelekî bilind bikin.
Weke hevrêyên wî û gelê Kurd em ê tu caran Îsmaîl Agaç ji bîr nekin. Em ê tim û tim wî zindî bigirin.’’
