Parlamenterê Îrlandayê û Serokê Neteweyî yê Sinn Feinê Declan Kearney di “Konferansa Aştî û Civaka Demokratîk a Navneteweyî” ya ku ji hêla DEM Partiyê ve li Navenda Çandê ya Cem Karaca Bakirkoy a Stenbolê tê lidaristin de axivî û ezmûnên xwe yên li Îrlandayê parve kir.
Serokê Neteweyî yê Sinn Feinê Declan Kearney pêvajoya aştiyê ya li Îrlandayê wiha vegot: “Bandora navneteweyî di destpêkirina pêvajoya aştiyê de erênî bû. Piştî damezrandina Peymana Îniya Bixêr, Yekîtiya Ewropayê jî tevkariyên girîng kirin. Lêbelê ev 27 sal in me karê xwe neqedandiye. Lê di encamê de di parvekirina hêza siyasî de hêzeke siyasî ya nû hat avakirin. Yek ji tiştên herî girîng ê li vir ew bû ku ji bo bidawîkirina pevçûnên li Îrlandayê rêyeke demokratîk bê avakirin. Em bi biryar bûn ku ew wekî peymaneke girêdar bê pêkanîn. Girîngiya peymanê ew bû ku statûko ne peymanek e û qebûlkirina pêşketin û guhertina demokratîk bû. Di peymanê de wekî pîvanên demokratîkbûnê, ligel danûstanina wekhev, çand û perwerdehiyê, gelek mafên me jî cih girtin. Sepana berdana girtiyan hat destpêkirin. Pêdiviya reforma polîtîk bi komîsyoneke serbixwe hat nirxandin. Hêza polîs a dewletê hat tasfiyekirin û hêzeke nû ya ewlehiyê hat avakirin. Peymana ‘Îniya Bixêr’ nelihevkirina hêzê çareser kir û rêveberên bakur û başûr anîn cem hev. Ji bo çek û cebilxaneyan komîsyonek hat avakirin, lê bêçekbûnê demeke dirêj girt. Ev jî bû gaveke zêdekirina baweriyê. Ev aştî û peymana Îrlandayê bi rewşek tenê ve girêdayî nînin. Gelek berfireh û tije guhêrbar bûn. Ji serî ve di warê parvekirina hêzan de tiştên neyînî jî qewimîn. Vana pirsgirêkên cidî jî afirandin. Lê pêşveçûnek erênî jî rû da.”
Kearney axaftina xwe wiha domand: “Divê em vê yekê jî bizanibin. Her çend 27 sal di ser ‘Peymana Îniya Bixêr’ re derbas bûbe jî, hîn bi temamî nehatiye pêkanîn. Ji ber vê pirsgirêka Îrlandayê hîn çareser nebûye. Pêwîst e ev pêvajo bi peymanên din berdewam bike. Muzakereya herî girîng divê her tim bi nirxên me re bê kirin. Em îdia dikin ku dema yekîtiya neteweyî hatiye. Divê pêvajoyên muzakereyê bi temamî berfireh bin, hemû mijar bi aşkerayî bên axaftin, her du alî bi niyeteke baş tevlî bibin, bawerî di navbera hev du aliyan de çêbibe, biryar bên pêkanîn. Civaka sivîl û girse divê tevlî pêvajoyê bên kirin. Di dawiyê de ji bo tifaqeke nû ya demokrasiyê ya di navbera Tirkiye û gelê Kurd de ez piştevaniya xwe ji Kurdan re radigihînim. Divê Tirkiye vê derfeta ku Kurdan pêşkêş kiriye bibîne. Ez bi ‘mafê hêviyê’ bawer im, lê ez bi hêviyê jî bawer im. Ji gelê Kurd re aştî, azadî û demokrasî. Ji Abdullah Ocalan re azadî.”
