Çarşema bihurî Tebeqeya Feqîr Cejna Çarşema Serê Nîsanê ku weke kewna dinyayê dibînin, pîroz kirin. Vê Çarşemê jî ku dikeve 15’ê Nîsanê wê cejna Çarşema Serê Nîsanê ya bavê Şêx ku bi fermî li Iraqê ji bo Êzidiya kirine betlane, li her derê were pîroz kirin.
Amadekariyên ji bo pîrozkirina Çarşema Serê Nîsanê li Şengalê dewam dike. Navenda Çand û hunera Şengalê û Navenda Stiya Nexşa wê bi boneya çarşema Serê Nîsanê li Geliyê Kersê yê Şengalê ahengeke girseyî li dar bixin. Wê di ahenge de Kolektîfa Saza Êzî, hunermendê Şengalî Hemîd Qîranî, Koma Bêrîvan, Koma Hêvî ya Zarokan derkevin ser dikê.
Wê ne tenê stran pêşengehên çandî, hunerî û pirtûkan jî hebin û wê di hewaya mîhrîcanê de derbas bibe. Wê li ser wateya cejnê peyam werin xwendin û dayîn. Aheng wê bi gerandina govendê bi dawî bibe.
Kolektîfa Saza Êzî ku cara yekemîn di Çarşema Serê Nîsanê ya 2025’an de tevlî ahenga Geliyê Kersê bû û avakirina xwe ragihandibû, îsal jî wê bi stranên xwe yên taybet ên Şengalî derkevin ser dike. Ji bo tevlîbûna ahengê jî li Navenda Çand û Hunera Şengalê amadekarî destpêkirine. Endamên Kolektîfa Saza Êzî ku ji gelek dengbêj û hunermend, tembûrvanên naskirî yên Şengalê pêktê, banga tevlîbûna ahenga geliyê kersê dikin.
Endamê Kolektîfa Saza Êzî û dengbêj Îskan Heliqî behsa amadekariyên xwe yên ji bo Çarşema Serê Nîsanê kir. Heliqî têkildarî amadekariyan ev agahiyan da: “Em amadekariya xwe ji bo Çarşema Serê Nîsanê ya 15’ê mehê dikin. Wê ji her derê gel tevlî pîrozbahiyê bibin. Em ê stranên folklorîk li wir bêjin. Cejna Çarşema Serê Nîsanê li hemû Êzidiyan pîroz dikin. Em vê cejnê li herkesên ku di dema fermanê de alîkarî dane Êzidiyan jî pîroz dikin. Em hêviyê ji xwedê dikin, ev cejin xêr û xweşî bi ser me de bîne. Em bang li hemû Êzidiyên li Iraq û derveyî Iraqê dikin ku tevlî şahiya Geliyê Kersê bibin. Me ya geliyê Kersê ya 15’ê mehê bibin. Emê bi stran û rengên xwe yên folklorîk derkevin ser dikê û berhemên xwe pêşkêş bikin.”
Endamê temen biçûk ê Kolektîfa Saza Êzî Eyad Berekat jî xwest berê her kesî li ahenga Geliyê Kersê be û ev bangê kir: “Em ê weke Kolektîfa Saza Êzî 15’ê mehê li deriyê geliyê Kersê ahengek çêbikin. Me divê hemû xelkê me yê Êzidxanê were. Bahareke xweşe û me divê gelê me were. Em jî biqasî dizanin ji were bêjin.”
Endamekî din ê Kolektîfa Saza Êzî Berces Xelef jî têkildarî mijarê wiha axivî: “Em weke hunermendên çiyayê Şengalê û Kolektîfa Saza Êzî dixwazin 15’ê mehê bi kêfxweşiyeke mezin pîroz bikin. Em dixwazin vê cejnê bi kêfxweşî bihevre derbas bikin. Hêvî dikin hemû rojên me bi kêf û xweşî derbas bibin. Çarşemê saet 11.00’an li deriyê Kersê amade bin.”
