Kovara Komunar a ku cara ewil di 27’ê Mijdarê de dest bi weşana xwe kir, 20’emîn salvegera xwe pîroz dike. 20 sal di jiyan, têkoşîn û dîroka weşanê de demeke girîng e. Çawa ku 20 sal ji bo ciwanek salên herî zindî û bi enerjî dagirtî be, ji bo kovar ango rojname jî salên herî xurt, gihîştî, xwe nas kiriye û bi gavên bihêztir hilberînê dike. Kovara Komunar 20 sal in bêyî navber bûye xwedî meşek bi vî rengî û gihaye van rojan. Kovara Komunar di sala 2005’an de hat avakirin û heta roja îro bêyî navber xebatên xwe didomîne. Ev xebat ji aliyê Akademiya Zanista Civakî ya Abdullah Ocalan ve tê birêvebirin.
Bi wesîleya 20’emîn salvegera weşana Kovara Komunarê gerîla û endamên Akademiya Zanista Civakî ya Abdullah Ocalan Roza Zagros, Serhed Rûken û Xebat Dicle ji ajansa me ANF’ê re li ser girîngiya xebatên kovarê axivîn.
‘KOMUNAR XEBATEKE KOMÎ YE’
Roza Zagros da zanîn ku 20 sal in Kovara Komunar xebatên xwe bêyî navber dimeşîne û got, “Ramanên Rêber Apo pêşengiya vî xebatî dike. Xebata Komunarê, xebateke avakirinê ye. Ger em bên naveroka kovarê xebat xebateke kolektîf e, bi rengekî komî tê meşandin. Ji ber ku bi rastî jî xebata Komunar xebateke komî ye û li ser vî esasî xebat tê meşandin. Ji ber vê yekê jî Komunar di nav hemû avahiyên rêxistinê de û di nav civakê de hem di milê perwerdê de, hem jî di milê avakirinê de nasnameyek bi dest xistiye.”
‘FIKIR Û ŞÊWAZA XEBATA RÊBER APO ESAS TÊ GIRTIN’
Serhed Rûken jî 20’emîn salvegera damezrandina Kovara Komunarê li Rêber Apo, şehîdên şoreşê û li tevahiya hevrêyan pîroz kir. Serhed Rûken got, “Her xebatê ku fikrê Rêber Apo parve dike, watedar û pîroze. Di nav 20 sala de, xebata ku fikrê Rêber Apo herî zêde parve kir kovara Komunar bû. Ji bo vê di hemû salên bihurî de hewildan hebû ku ev kovar bi îstîkrar derkeve û nêrînen Reber Apo bigihîne hevrêyan û gel. Îro fikirên Rêber Apo civaka Kurd, Rojhilata Navîn derbas kiriye û bûye gerdûnî. Di asta cîhanî de fikrên Rêber Apo tên nirxandin û nîqaş kirin. Ji bo civakên bindest, pergelên din jî paradîgmaya Rêber Apo û modernîteya demokratîk hêviyeke. Her nêrînek Rêber Apo, her hevokek û her berhemek wî di nav civakê de bi baldarî tê şopandin û nîqaşkirin. Ji ber ku nêrînên Rêber Apo di çerçoveya jiyana azad de tên parve kirin û şopandin. Ne tenê parve kirina fikrên Rêber Apo di heman demê de şêwaza xebata Rêbar Apo tê esas girtin. Ji bo jiyanek azad û avakirina civaka demokratîk, armanca herî sereke ew e ku civak bikare pêşiya xwe bibîne, li ser vê bingehê jiyana xwe ava bike û çanda xwe nûjen bike.”
‘KESÊ KU NE XWEDÎ TEORIYEK SAXLEM BE, NIKARE BIBE XWEDÎ PRATÎKEK SAXLEM’
Xebat Dicle, jî anî ziman ku gotina Rêber Apo ‘Kesê ku ne xwedî teoriyek saxlem be, nikare bibe xwedî pratîkek saxlem’ motîvasyona wan a esasiye û got, “Em weke endamên Akademiya Zanista Civakî ya Abdullah Ocalan bi vê armancê tevdigerin. Tiştê ku wê ji kovarên din cuda û xweser digire, kovarek ku xwedî şehîd in. Ji dema derketina vê kovarê û vir ve gelek hevrêyên me rasterast bi kovarê re mijûl bûn û bi nivîsên xwe tevkariyek mezin kirin. Hevrêyên me Sînan Şahîn di sala 2008 û Erdal Tolhildan jî di sala 2022’yan de dema ku xebatên kovarê dimeşandin, şehîd bûn. Navê kovarê li ser pêşniyara Rêber Apo pêk hat. Mîna çawa ku Akademiya Zanista Civakî ya Abdullah Ocalan pêşniyar kiriye. Weke Tevger jî em di pêvajoyeke guhertin-veguhertinê de ne. Yek ji xebatên ku dê pêşengiya vê guhertin-veguhertinê bike jî xebatên akademiyê ye. Di hemû serdema guhertinan de ev yek bi vî rengî ye. Di vê pêvajoyê de xebatên akademiyê wê hê bêhtir rolek taybet bilîze. Dê mîsyon û cihek taybet a kovara me hebe. Weke Akademiya Zanista Civakî ya Abdullah Ocalan em dixwazin ronesansa Kurd li Rojhilata Navîn û cîhanê belav bikin. Di vê wateyê de em dixwazin roleke pêşengiyê bilîzin.”
