Tora Têkoşîna li dijî Tundiyê ya Amedê li hemberî kuştina jinan û mirina bi guman a jinan dest bi “Nobeda Hiş, Edalet û Jinê” dike.
Daxuyaniya li ser mijarê li Komeleya Jinê ya Roas hate dayin û hate gotin, nobed wê 6’ê Cotmeha 2026’an saet di 12:30’î de li ber Edliyeya li Amedê destpê bike û 10 hefteyan her roja Sêşemê li heman cihî dewam bike.
Bi navê jinan endama Navenda Mafên Jinan a Baroya Amedê Îrem Îlhan daxuyanî da û diyar kir ku mirina jinan carna weke “xwekuştin”, “qeza” yan jî “mirina bi guman” têne pênasekirin û bi xurtî nayê lêpirsîn.
Îrem Îlhan anî ziman ku divê kuştina jinan weke bûyerên kêmcaran rûdayî neyê dîtin û divê bi tundiya li nava malê, gefxwarin, şopandina bi israr, peydakirina çekê, bicihneanîna biryarên parastinê, nemeşandina lêpirsîna bi bandor û bêcezahiştinê were nirxandin.
HER HEFTE WÊ QALA ÇÎROKÊN JINAN BÊ KIRIN
Hate ragihandin ku di çarçoveya nobedê de wê her hefte qala jiyana jinên hatin kuştin bê kirin û pirsên bê bersiv ên di dozan de bixin rojevê.
Îrem Îlhan anî ziman ku nobed wê ne tenê ji bo cezakirina kiryaran be, di heman demê de wê hesabdayina saziyên erkdar û wezîfedaran be ku di mijara parastina jinan de berpirsyariya xwe bi cih neanîn.
Tora Têkoşîna li dijî Tundiya li Jinê ya Amedê bang li rêxistinên jinan, rêxistinên hiqûqî û mafên mirovan, saziyên demokratîk û welatiyan kir ku beşdarî nobedê bibin ku wê 6’ê Cotmehê destpê bike.
