Li Binarê Qendîlê di merasîmek bi amadebûna malbata Şehîd Solîn, hejmarek ji malbatên şehîdan û welatiyên herêmê Parka Şehîd Solîn hat vekirin.
Merasîm bi deqeyek rêzgirtin ji bo giyanê şehîdên rêya azadiyê dest pê kir. Piştre Hevserokê Binarê Qendîlê Dilşêr Îbrahîm, axivî û wiha got: “Îro dema ku Baxçeyê Şehîd Solîn tê vekirin, em tenê şûnekê ji bo lîstok û derbaskirina wextê zarokan amade nakin, belkî em peyameke mezin ji bo paşerojê dişînin. Peyamek ku dibêje gelekî ku zarokên xwe ji bîr neke, paşeroja wî jî ji bîr nabe. Şehîd Solîn zarokeke bê suc bû ku temenê wê tenê du meh bûn. Jiyana wê bi destê bombebaranê hat kurtkirin, lê belê navê wê zaroka biçûk îro dibe navê şûnekê ku wê tije bibe ji ken, lîstok, fêrbûn û xewnên ciwan. Armanca me tenê çêkirina parkekê nebû, belkî çêkirina şûnekê bû ji bo pêşxistin, fêrbûn û afirandinê ye.’’
Piştre di merasîmê de, mamê şehîd Yeqûb Mistefa, li ser navê malbata Şehîd Solîn gotara xwe pêşkêş kir û tê de spasiya Şaredariya Qendîlê kir ku ev park li ser navê zaroka wan binav kirine û wekî wefadariyekê ji bo tevahiya şehîdan, bêyî cudahiya temen û ramanan, dibînin.
Di merasîmê de peyama taybet a Rêber Abdullah Ocalan a ji bo zarokan hat xwendin. Piştre Hevserokê Encûmena Gel a Binarê Qendîlê li ser navê welatiyên herêmê spasiya Şaredariya Binarê Qendîlê kir ku ji aliyê proje û xizmetguzariyan ve guh dane hemû temenên cuda.
Hêjayî gotinê ye ku Parka Şehîd Solîn li ser navê yekemîn şehîda zarok a Binarê Qendîlê hatiye navkirin ku di sala 2011’an de di encama bombebarana balafirên şer ên artêşa Tirk a dagirker de şehîd bibû.
