Tora Mafên Mirovan a Kurdistanê (KHRN) ragihand ku sê girtiyên siyasî yên Kurd ên li girtîgehên Urmiye û Tehranê yên Îranê, tevî ku pirsgirêkên tenduristiyê yên giran dijîn jî nayên dermankirin.
Huseyîn Osmanî (65) ku li Girtîgeha Urmiyeyê tê ragirtin, ji ber katarakta çavê xwe yê çepê pirsgirêkên giran ên dîtinê dijî. Li gorî KHRN’ê rayedarên girtîgehê destûrê nadin ku Osmanî sewqî nexweşxaneyeke li derveyî girtîgehê bê kirin. Osmanî yê ku 30 sal cezayê girtîgehê lê hatiye birîn, ev 13 sal in di girtîgehê de ye.
Osmanî piştî ku di sala 2014’an de hat girtin 13 mehan di hucreya yekkesî de hat ragirtin û di vê pêvajoyê de rastî êşkenceya giran a fîzîkî û psîkolojîk hat. Cezayê darvekirinê yê lê hatibû birîn di sala 2015’an de ji aliyê Dadgeha Bilind ve hat betalkirin û di sala 2018’an de 30 sal cezayê girtîgehê lê hat birîn. Osmanî dibêje ku sûcdariyên derbarê wî de xwe dispêre îtîrafên ku di bin êşkenceyê dehatine girtin.
Behrem Mecîdî-Fer ê ku li heman girtîgehê tê ragirtin, di mehên dawî de bi giranî tansiyona wî dadikeve. Tevî ku bijîşkên girtîgehê pêşniyar kirine ku wî sewqî pisporê kardiyolojiyê bikin jî hat ragihandin ku rêveberiya girtîgehê destûrê nade daku sewqî nexweşxaneyeke derve bê kirin. Mecîdî-Ferdi sala 2024’an de hat girtin û ji ber endamtiya Partiya Demokrat a Kurdistana Îranê (PDKÎ) û bi îdiaya “propagandaya li dijî dewletê” ceza lê hatiye birîn.
Mutalîb Ehmediyan ê ku li Girtîgeha Evînê tê ragirtin, tevî nexweşiya penceşêrê, gelek pirsgirêkên giran ên tenduristiyê dijî . KHRN’ê destnîşan kir ku tevî di rapora tiba edlî de hatiye diyarkirin ku şert û mercên girtîgehê ji bo wî ne guncaw in jî, dozgeriya Tehranê daxwazên taloqkirina cezayê wî an jî dermankirinê red kiriye.
Hat ragihandin ku ji ber derengketina destwerdan bijîşkî, tumora Ehmediyan a ku destpêkê wekî tumoreke baş-xwezayî dihat zanîn, veguheriye tumoreke xirab û belav bûye û di vê pêvajoyê de kîsika zirav, beşek ji kezebê û beşek ji rûviya stûr bi emeliyatê hatine girtin. Her wiha pirsgirêkên wî yên tenduristiyê yên wekî penceşêra mîdeyê, fitqa diyaframê, tengbûna zimarika piştê û enfeksiyona mîzkêşê jî hene.
Ehmediyan ji bo protestokirina astengkirina mafê gihîştina xizmetên tenduristiyê yên pispor ên li derveyî girtîgehê, di 5’ê Gulana 2025’an de dest bi greva birçîbûnê kir û di vê pêvajoyê de zêdetirî 35 kîloyan winda kir.
