Hunermend Sîpan Xelat û Mem Ozan jî beşdarî bernameya verkirina akademiyê bûn û piştgirî dan. Bernameyê bi deqeyeke rêzgirtinê ya ji bo bîranîna cangoriyên têkoşîna azadiyê ya Kurd destpê kir.
Di axaftinên li vekirinê de hate ragihandin ku gelê Kurd salên dûr û dirêj li polîtîkayên înkar û asîmîlasyonê rast hat û hate destnîşanikrin ku têkoşîna li qada çand û hunerê tê meşandin yek ji hêmanên bingehîn ên têkoşîna hebûnê ya gel e. Hate gotin, saziyên Kurd ên li dîasporayê têne vekirin ji bo parastina nasnameyê û zindîhiştina bîra kolektîf bi roleke dîrokî radibin.
Hunermend Sîpan Xelat jî diyar kir ku karên çand û hunerê di têkoşîna azadiyê ya gelan de xwedî cihekî diyarker e û got, Akademiya Çand û Hunerê ya Kurd wê valahiyeke girîng a li dîasporayê dagire.
Hunermend Mem Ozan jî anî ziman ku hunera Kurd bîreke berxwedanê ye û got, “Akademiya îro li vê derê hate vekirin ne tenê cihekî hunerê ye. Ev akademî bîra gelê Kurd e, deng û berxwedana gelê Kurd e. Zimanên ku bi salan hate qedexekirin, stranên ku bêdengî li wan hate ferzkirin îro li Liverpoolê jinûve geş dibin ku ev yek gelekî bi wate ye. Xwedîderketina li çanda xwe yek ji rêyên herî xurt ên parastina azadiya xwe ye.”
Hate ragihandin ku akademî wê di dema pêş de li qadên muzîk, dengbêjî, wêje, govend û zimanê Kurdî kar bike. Akademî bi taybetî dixwaze ku ciwanan bigihîne çand û hunerê.
