Civaka Êzidî doh li Şengal, Êzîdxan, Kurdistan û hemû deverên ku lê ne, cejna xwe ya herî pîroz, Cejna Çarşema Serê Nîsanê pîroz kir. Ji ber ku di baweriya Êzdatiyê de ev roj, roja kewna dinyayê ango roja afirandinê ye, civaka Êzidî jî nasnameya xwe ya xwe ya rengîn a ku di dîrokê de her tim bûye sedema ferman û talanan, di vê roja pîroz de bi hemû xemlên xwe ve nîşan dide.
Doh li Şengalê jî, li Geliyê Kersê, li quntara Çiyayê Şengalê civaka Êzidî cejna xwe bi biharê re, bi meha Nîsanê re, bi têkoşîna xwe ya hebûnê re kir yek û bi coşeke mezin pîroz kir. Ji Qendîl, Mexmûr, Bexda, Rojavayê Kurdistanê, Şêxan û gelek deverên din an şande hatin Şengalê an jî peyamên xwe yên pîrozbahiyê gihandin civaka Êzidî. Bi taybetî wargeha Mexmûrê, bi şandeyeke berfireh û bi berhemên hunerî yên wargehê beşdariyeke xurt nîşan dan.
‘FIKRÊ RÊBER APO MEXMÛR Û ŞENGAL KIRIYE YEK’
Hevseroka Şaredariya Mexmûrê Gurbet Îşler anî ziman ku ew ji wargeha Mexmûrê ji bo pîrozkirina Çarşema Serê Nîsanê hatine Şengalê û got: “Em kêfxweş in ku vê rojê bi civaka xwe ya Êzidî re pîroz dikin. Hem cihê kêfxweşiyê, hem jî serbilindiyê ye. Yê em anîne ba hev ku îro em van rojan bi hev re pîroz dikin, îdeolojiya Rêber Apo ye. Rêber Apo ew fikrê ku ti ferq naxe navbera çand û baweriyan daye me. Ev fikir îro em anîne vî cihê pîroz, quntara Çiyayê Şengalê. Em her êrişeke li ser Şengalê çêdibe, weke Mexmûr van êrişan li ser xwe jî dibînin. Armanca ji van êrişan bê nasnamekirin, bê çandkirin û bê zimankirina xelkê me yê Şengalê û tevahî gelê Kurd e. Civaka me ya Şengalê 74 ferman jiyan kirine. Herî zêde jî jin û zarok bûne qûrbanî. Bi dilekî şikestî jî be, em vê rojê pîroz dikin. Lê wê têkoşîna me ya ji bo wan bidome. Weke jinên ciwan erka me ye ku em xwe bikin yek û li ser fikrê Rêber Apo birêxistin bikin. Encax bi vî awayî em karibin li dijî êrişan bisekinin.”
‘JI BO ÊZIDIYAN ROJA AFIRANDINA DINYAYÊ YE’
Mamoste Lîza Feqîr jî balê kişand ser girîngiya vê cejnê ji bo civaka Êzidî û wiha axivî: “Em vê rojê weke rojeke taybet dibînin. Em Êzidî vê rojê weke roja afirandina gerdûnê dibînin. Ji ber dinya di vê rojê de hatiye afirandin û kewnandin. Em gelekî kêfxweş in ku dikarin weke Êzidî vê rojê pîroz bikin, ji bo çanda xwe ji bîr nekin û bijîn. Ez cejnê li hemû Êzidiyan û xelkê li vir kom bûye pîroz dikim.”
Endama Yekîtiya Ciwanên Mexmûrê Axîn Gokalp cejn li Rêber Apo, li hemû civaka Êzidî pîroz kir û got: “Weke xelkê Mexmûrê me xwest em tevlî vê cejnê bibin. Ev rojeke watedar û girîng e, roja kewna dinyayê ye.”
Yek ji beşdarên pîrozbahiya cejnê Lavîn Nayîf jî anî ziman roja Çarşema Serê Nîsanê sersala Êzidiyan e û wiha got: “Nîsan bûka salê ye. Em gelek kêfxweş in ku hatine vê derê. Ez vê cejnê li tevahî Êzidiyan pîroz dikim.”
