Koçberekî ji gundê Xirbê Çemo yê Serêkaniyê Xidir Zahir Sîno dema ku serdana gundê xwe kir û xwest li rewşa mal û mulkên xwe binêre, matmayî ma. Sîno dît ku çeteyên dewleta Tirk a dagirker gelek erdên xelkê gund desteser kirine.
Sîno li ser tiştên ku li gundê xwe dîtine ji ajansa ANHA’yê re axivî û diyar kir ku dema ew çûye serdana gundê xwe dît 5 derase genim û ceh diçinin û wiha got: “Min xwest ez nêzî karkeran bibim û bi wan re baxivim da ku erdê min bidin min, destûr nedan ku ez nêz bibim. Min xwest ku ez fêm bikim erdê min di destê kî de ye lê belê tenê ji min re gotin ku navê wî kesî Muelim e û tiştekî dîtir ji min re negotin. Min ji wan re got ez xwediyê vî erdî me û ev bûye bi salan erdê min ji xwe re diçînin. Min ji wan xwest ku ji nava erdê min derbikevin lê belê berdan min û destûr nedan ez nêzî erdê xwe bibim.”
Sîno got ku dema ew ji gund derketiye dîtiye ku çeteyan destê xwe danîne ser erdên gundê wan û yên derdorê. Her wiha yek ji malên gundiyan jî kirine cihê komkirina deraseyan û kesên li wê malê bûn, leşker bûn.
Koçberê Serêkaniyê Xidir Zahir Sîno daxwaz kir ku dawî li van kiryaran were û ewle vegerin gundê xwe. Her wiha xwest ku mal û milkên wan ên desteserkirine li wan vegerînin.
Şêniyên Serêkaniyê ji sala 2019`an ve ji ber êrişa li ser Serêkaniyê û dagirkirina wê neçarî koçberiyê bûn. Ev bi salane ku çeteyên girêdayî dewleta Tirk mal û milkên wan dagirkirine. Ew dixwazin ku dawî li zor û zehmetiyên wan werin û vegerin warê xwe.
