Li Sûdanê şer û pevçûn didomin. Hêzên Piştgiriya Lezgîn (HPL), ragihand ku ew agirbesta mirovî ku ji aliyê Dewletên Yekbûyî yên Emerîkayê, Erebistana Siûdî, Misir û Mîrnişînên Erebî yên Yekbûyî hatiye pêşniyarkirin, qebûl dike. HPL’ê, diyar kir ku armanca agirbestê parastina sivîlan û kêmkirina bandora şer a li ser mirovan e.
Lê belê, ajansên nûçeyan ên li Qeterê ragihandin ku artêşa Sûdanê hê agirbestê erê nekiriye.
Hat diyarkirin ku plana agirbestê dê di nava sê mehan de dest pê bike û ev yek dikare rê li ber çareseriyek siyasî ya mayînde veke û ji bo hikûmeteke sivîl zemîn amade bike.
NY: BI HEZARAN KES DI REWŞÊN KRÎTÎK DE NE
Koordînasyona Ofîsa Karûbarên Mirovî ya Neteweyên Yekbûyî (OCHA), diyar kir ku bi hezaran kesên ji ber dijwarbûna şer neçar mane ji bajarê El-Fashîr ê Bakurê Darfûrê derkevin di şert û mercên krîtîk ên mirovî de dijîn. Li gorî OCHA’yê malbatên koçber ji xwarin, av, stargeh û lênêrîna tenduristiyê bêpar in.
Li Kampa Tewîla bêhtirî 650 hezar koçber hene. Pêla nû ya koçberiyê ji bajarê El-Fashîrê barê kampê girantir kir. OCHA û rêxistinên din ên alîkariyê ji bo avakirina kampên nû li herêmê dixebitin.
Hat ragihandin ku di 26’ê Cotmehê de piştî HPL’ê bajarê El-Fashîr xist bin kontrola xwe, li dijî sivîlan komkujî pêk aniye. Şer li herêma Kordofanê berdewam dike, bi hezaran mirov neçar dimînin ku bi peya derbasî herêmên ewle bibin. Li wir jî di dabînkirina pêdiviyên jiyanî yên wekî xwarin û avê de zehmetî dikêşin. OCHA, ragihand ku tevî pêdiviya zêde jî, alîkarî hîn jî gelek kêm e.
Şerê ku ji Nîsana 2023’yan vir ve berdewam dike, bûye sedema mirina bi hezaran û koçberbûna bi mîlyonan mirovan. Ev yek li cîhanê bûye krîza mirovî ya herî mezin.
