Li Wanê ji bo gerîlaya YJA Starê Neslîhan Akgul (Bêrîtan Alan) û yek ji fermandarên pêşeng ên HPG’ê Bedîrxan Abo (Masîro Xabûr) merasîmên sersaxiyê hatin lidarxistin.
Gerîla Neslîhan Akgul di 11’ê Çileya 2020’an de li herêma Garê di pevçûnekê de şehîd bibû. Fermandar Bedîrxan Abo jî di 27’ê Gulana 2020’an de tevlî karwana şehîdan bibû.
Teziyeya ku li taxa Dere ya navçeya Artemêtê ji bo gerîla Neslîhan Akgul hatibû dayîn, ji aliyê MEBYA-DER, TUHAY-DER, Dayikên Aştiyê û sedan kes ve hat ziyaretkirin. Girse bi dirûşmeya “Şehîd Namirin” berê xwe dan cihê teziyê.
Piştre girse berê xwe da teziyeya ku li taxa Xaçortê ji bo Bedîrxan Abo hatibû dayîn. Li vir jî girse bi dirûşmeyên “Şehîd Namirin” û “Bijî Serok Apo” berzkirin û li cihê teziyê sirûda Çerxa Şoreşê xwendin.
Hevseroka MEBYA-DER’ê Hanim Kaya, li teziyê axivî û got, “Ger îro em bi rengekî azad dikarin bi ziman û nasnameya xwe bijîn, ev yek bi saya wan e.”
Hevserokê DEM Partî yê Wanê Veysî Dîlekçî jî, banga Rêber Apo ya dawî bibîr xist û behsa girîngiya yekîtiya Kurdan kir.
Piştî duayan serdana teziyeyan bi dawî bû.
