Alîkarê Hevserokên Giştî yên DEM Partiyê yê ji Komîsyona Rêxistinbûnê Berpirsyar Mahfûz Guleryuz têkildarî statu û rola Rêber Apo ya di pêvajoyê de ji ANF’ê re axivî.
Guleryuz bi bîr xist ku pêvajo bi îradeya Rêber Apo destpê kir û haya dewletê û raya giştî ji vê heye.
Guleryuz anî ziman ku di nava dewletê de mekanîzmayek heye ku naxwaze rola Rêber Apo fermî bibe û diyar kir ku di çarçoveya pêvajoyê de çar komîsyon ava bûn, yek ji wan jî ew komîsyon e ku Rêber Apo wê di nav de be.
Mahfûz Guleryuz got, “Destpêka vê pêvajoyê bi Birêz Ocalan pêk hat. Îradeya ku Serok Ocalan danî holê ji aliyê tevahiya civakê û raya giştî ve tê zanîn. Rayedarên dewletê jî bi vê zanin. Lê belê bi taybetî mekanîzmayek li nava dewletê xwedî wê meylê ye ku naxwaze rola Birêz Ocalan fermî bibe.
Li gel vê yekê bi taybetî bi rêya komîsyonên jêrîn komîsyonek hate avakirin. Li gel komîsyonê, komîsyonên ku wê pêvajoyê bişopînin, pêşketinê pêk bînin û bersivê bidin pêwîstiyên pratîkî jî ava bûn. Çar komîsyon hatin avakirin. Yek ji van komîsyonan jî ew komîsyon e ku wê Birêz Ocalan di nav de be.
Birêz Ocalan di nava van komîsyonan de wê di komîsyona li ser bêçekbûnê û stratejîk de cih bigire û bi rol û mîsyona xwe rabe.”
‘DEMA AXAFTINA BI NAVÊ OCALAN DIVÊ ÊDÎ BIQEDE’
Guleryuz ragihand ku nîqaşên têkildarî Rêber Apo ji aliyê derdorên cuda ve têne kirin ji aliyê rêveçûna erênî ya pêvajoyê ve pirsgirêk e û anî ziman ku divê Rêber Apo karibe yekser ji civakê re biaxive.
Guleryuz got, “Divê êdî raya giştî hemû zanibe ku axaftina Birêz ocalan bi xwe gelekî rast û pêwîst e” û axaftina xwe bi vî rengî dewam kir, “Bi taybetî têkildarî Serok Ocalan dema dawî li nava raya giştî nîqaşên mezin hatin kirin. Weke ku qadeke mayinkirî hate avakirin. Niha her kes li ser navê wî diaxive. Rojnamevan cuda diaxivin, siyasetmedar cuda diaxivin. Her kes li gorî xwe vegotineke Ocalan dike. Li ser gotinên wî daxuyaniyan didin.
Em vê nîqaşê êdî biterikînin. Yek ji pêwîstiyên mercên karkirinê yên azad û jiyana azad ev e. Ez çima bi navê Birêz Ocalan biaxivim, yan jî yekî din li gorî xwe şîrove bike? Birêz Ocalan aktorê herî girîng ê vê pêvajoyê ye, yek ji rêveberên asta yekemîn ê vê pêvajoyê ye. Wê demê dem hatiye ku êdî ew bi xwe ji civakê re biaxive.”
‘DI KOORDÎNASYONA PÊVAJOYÊ DE ROLA OCALAN GIRÎNG E’
Mahfûz Guleryuz destnîşan kir ku di koordînasyona pêvajoyê û qonaxa bêçekbûnê de rola Rêber Apo girîng e û diyar kir ku mijara azadiya wî ya fîzîkî hîn di vê qonaxê de nîne, lê belê rêveçûna pêvajoyê bi Rêber Apo re wê bê nirxandin.
Guleryuz got, “Em zanin ku bi taybetî koordînasyona vê pêvajoyê, meşandina vê pêvajoyê, rê û rêbazên asta bêçekbûnê, kî wê li ku bi cih bibe; ev nîqaş hemû wê li gel Birêz Ocalan bê meşandin. Ev girîng e, qonaxeke dîrokî ye.”
Guleryuz ragihand ku komîsyonên hatina vakirin ji aliyê çareseriya meseleya Kurd ve li gel kêmasiyên xwe jî gaveke şênber e û destnîşan kir ku komîsyon divê karên xwe dereng nexîne.
‘ÇARESERÎ DIVÊ BI DESTÛRA BINGEHÎN Û SERERASTKIRINÊN QANÛNÎ BE’
Guleryuz anî ziman ku aştî û çareseriya meseleya Kurd ji bidawîkirina şerê çekdarî berfirehtir e û işaret bi pêwîstiya guhertina destûra bingehîn û qanûnan kir. Guleryuz got, “Eger em ji kodên înkarê yên komarê rizgar bibin, em ê hingî ji meseleya Kurd jî ji kodên raperînê jî rizgar bibin.”
Guleryuz diyar kir ku ji HEP heta bi DEM Partyê yek ji daxwazên bingehîn ên têkoşîna siyasî naskirina mafên Kurdan e û got, “Ev têkoşîn ji bo komara demokratîk e. Em vê yekê ne tenê ji bo Kurdan difikirin. Komara Demokratîk meseleyeke demokratîkbûnê ya tevahiya Komara Tirkiyeyê ye.”
