Kes dizane ku ev zarokê dildar çawa ye! Ew zarokê bi rûkenî û çavên tijî hêvî ne. Ew mirovên ku xwe bi çiyan re kirine yek, bi çav û dilên tijî hêvî, her tim xwe bi jiyanê re kirine yek, ji riyên dûr û dirêj berê xwe dane riyên asê û çiyayî, bi her gav avêtinekî xwe dibin hêz û çavkaniya hêviya mirovên azadîxwaz. Yek ji parezvanê welat, ew bi hêza xwe bû ziman, çav, deng, û hestên hemû gelê Kurd. Hevalê Ferzad bi kamera û pênûsa xwe, bû milîtanê Ragihandina Azad.
Zarokê Medî, ku bi çîrokên berxwedanê mezin bûye, her çîrokek di bîra xwe de parastiye, ev yek jî li ser mezinbûna Huseyîn bûye xwedî bandorekî mezin. Huseyîn di nava malbatekî welatparêz de, bi nirxên xwe re girêdayî mayî mezin dibe. Ew di sala 1989’an li bajarê Îdirê ji dayik dibe, zarokatî, çand û exlaqê xwe ji malbata xwe ya xwedî nirx digire. Elbet çanda malbatê ya bi nirxên xwe re girêdayî mayî, li ser têşe girtina Huseyin jî bandor dike. Huseyin hîn di zarokatiya xwe de, ji ber welatparêziya malbatê, her wiha dema ku dest bi karkirine dike, rastiya dijmin ji nêz ve dibîne, ev yek jî dibe sedem ku bikeve nava lêgerînên xwe naskirinê.
Lêgerîn û mereqa wî dihêle ku gavên ber bi şoreşgertiyê re bavêje. Bi vê yekê dest bi xebatên ciwanan dike, bi awayekî çalak bi rolê xwe radibe. Lewma dibe hedefa dijminê dagirker. Ruxmê ku sê salan dîl tê girtin jî, lê ti carî dev ji doza xwe bernade, her wiha têkoşîna xwe bilindtir dike. Ew soz dide ku wê bibe deng û çavê gelê xwe. Bi vê yekê re rêwîtiya wî ya azadiyê despê dike. Di sala 2012’an meşa di têkoşîn û şopa heqîqetê de ya şervanê heqîqetê despê dike.
Milîtanê Heqîqetê, Egîdê Ragihandina Azad Ferzad Medî, bi ked û hezkirina xwe ya jiyanê re, bi baweriya xwe ya bi azadî û ramanên Rêber Apo re, dibe çavkaniya hêz û tevlîbûna bê tereddud. Ew di sala 2012’an de tevlî nava refên Gerîlayên Azadiyê dibe. Li qada Garê perwerda xwe ya bingehîn dibîne. Bi awayekî serkeftî perwerdeya xwe bi dawî dike, piştî perwerdê vesaziya wî li qadê çêdibe. Ew bi kelecanekî mezin derbasî piratîkê dibe.
Heval Ferzad piştî ku derbasî qada pratîkê dibe ji ber ku xwedî wê zanebûnê ye, bi çavekî hunerî li jiyana gerîla meze dike. Ev yek jî dibe bingeha gavên nû ji bo meşa hevalê Ferzad. Lewma piştî demekî kurt derbasî qada ragihandina Gerîla dibe. Bi derbasbûna xwe ya van xebatan re, bi soza ku xwedî derketina li keda mîrasa heyî, heman demê bi soza her tim wê bibe şopînerekî rast yê Xelîl Dag û Gurbettelî Ersoz gav diavêje. Lewra bi her nivîsekî xwe, bi wêneyekî xwe rastiya têkoşîna gerîlayên azadiyê, bi her kesî dide nasîn. Bi taybet li hemberî medyaya şerê taybet, bi hêrsekî mezin têkoşîn dike, bi xebatên xwe dibe hêza bersiv dayinê.
Di nava xebatên xwe de, her tim bi kelecan û dildariyekî mezin nêz dibe. Heval Ferzad bi ciddiyetekî mezin nêzî xebatên xwe dibe. Heman demê ti carî gavên xwe paşde navêje, berovajî wê her tim di nava lêgerîna xurt kirina xebatên xwe de bûye. Lewma kedekî mezin raber dike. Ruxmê pir zehmetiyan jî bi israra xwe dixebite. Ew bi kedkari û hezkirina xwe ya ji xebatan re, di nava rêhevalên xwe de tê nasîn, her wiha dibe cihê mînakê ji rêhevalên xwe yên çapemeniyê re. Ew di her hêla xebatên xwe de bi pisporî û bi ciddiyet nêz dibe. Bi nivîsên xwe, bi taybetî jî di aliyê wergera ziman de xwedî kedekî mezin e.
Bi ked û hewildanên xwe ve, ji hemû hêzên gerîla re dibe alîkar, ji ber bi xebatên xwe di milê amedekariya meteryalên perwerdê de xwedî roleke mezin e. Ew bi xebat û keda xwe xwedî li gotina xwe derdikeve, ji ber ew her tim wiha dibêje “ya ku piştî Gerîla dimîne, wêne û fikrên wî ne”. Ew bi vê zanebûnê her tim nêzî xebatên xwe dibe, bi awayekî bê navber dixebite, bi kamera xwe her kêliyên gerîla dikişîne, di heman demê de bi pênûsa xwe, her kêliya têkoşîn û lehengtiya gerîlayan dike roman ji gelê xwe re.
Ew ne tenê berxwedaniya gerîla diteyisîne, di heman demê de ew berxwedaniya gelê qeherman jî diteyisîne. Bi destpêkirina êrîşên çeteyên DAÎŞ’ê yê li ser qadên Mexmûr û Kerkukê, hêzên gerîla ango şervanên gelê xwe dema derbasi berxwedanîya wê heremê dibin, ew jî piştî demekî ji bo cihê hevalên xwe dagire ew jî berê xwe dide. Di çanda tevgera Apoyî de ti carî şûna şehîdan vala nayê hîştin. Lewma piştî şahedeta heval Denîz Firat, heval Rûbar Kerboran û heval Evîndar Cûdî ew berê xwe dide qadên Mexmûr û Kerkûkê. Di eniyên herî pêş de bi rolê xwe radibe, ew li wir lehengtiya gel û hêzên gerîla bi her kesî dide nasîn. Her tim di milekî wî de çekê wî, di milekî de kamera wî, her tiştî dike bîr û ji dîrokê re dihêle. Piştî bi erkên xwe yên şoreşgerî bi dawî dike, careke din berê xwe dide çiyayên azad.
Zarokê çiyayî vê carê xwe ji rêwîtiyekî dûr û dirêj re amede dike. Heval Ferzad her tim xwe li gorî qadên Bakur amede kiriye, li gorî vê jî her tim xwe perwerde kiriye. Ji ber ew dixwaze proje û xebatên heval Xelîl Dag û heval Arîn Amed bidomîne. Li ser vê bingehê bi çek û kameraya xwe re, di sala 2017’an de derbasî qadên Bakurê welat dibe. Ew bi têkoşîn û keda xwe, di qadên herî dijwar de cih digire, bi vê yekê hemû rewşên heyî bi kamera û pênûsa xwe bi belge dike. Bi van xebatên xwe li hemberî wijdanê mirovahiyê bi erkên xwe yên şoreşgerî radibe û pêk tîne.
Heval Ferzad, her tim bi kesayeta xwe ya dilnizim, bi kelecan û morale xwe yê bilind, bi rihê xwe yê zarokatiyê ku ti carî wenda nekirî, cihê xwe di dilê me hemû hevalên xwe de hêştiye. Lewma dema di civata hevalan de navê wî tê ziman, ked, hezkirina jiyanê, kelecan û girêdana bi çiyan re tê bîra her hevalekî.
Ew hezkirin û girêdana xwe ya bi jiyanê re bi van hevokan pênase dike. “Ger ku jiyan bi têkoşînê ve were xemilandin bi wate ye. Yan ti wateyeke xwe nîn e. Ji lewra jiyîn nayê weteya rast jiyandinê. Di roja meya îroyîn de gelek mirov hene ku ti cudabûna wan ji zombiyan nîn e,l ê bes tu ji wan bipirsî ew jî xwe wekî dijîn dibînin. Heta ku bawer dikin ku jiyana rast û azad ew dijîn. Ji ber vê yekê girîng e ku mirov çarçoveya jiyana rast, azad û rasteqîn bi xetên sitûr xêz bike”.
Heval Ferzad di têkoşîna xwe ya 6 salan bê navber ked raber kiriye. Di dîroka 28’ê Hezîrana 2018’an de li qada Garzanê de, di encama êrîşekî hovane ya dewleta Tirk de tevlî karwanên nemir ên Kurdistanê dibe.
Heval Ferzad di qada ragihandinê de, her tim bûye sembola keda bê hesab. Bi taybet dildariya wî ya ji çiyayan re, bawerîya wî ya bi hevaltiyê re, her tim ji me re bûye rênîşander ku em hemû rêhevalên wî di şopa wî de bimeşin û têkoşînê bilind bikin. Ew bi ked û xebatên xwe re bûye mînaka milîtaniya ragihandina azad. Wekî rêhevalên wî em soz didin ku em ê xwedî li mîrasa wî ya ku ji me re hîştîye derkevin û em ê xeyalên wî pêk bînin.
