Hevserokatiya Konseya Rêveber a KCK’ê peyamek ji pîrozbahiya Newrozê ya li Qendîlê re şand. Peyama KCK’ê bi vî rengî ye:
“Hevserokatiya Konseya Rêveber a KCK’ê
Gelê hêja yê Qendîlê û gelê me yê ku dilê wan bi evîna azadiyê lêdide û hatî Newroza Qendîlê, hûn bi xêr hatin. Em bi germahiya agirê Newrozê û hesreta azadiyê we hemûyan bi rêzdarî silav dikin û Newroza we pîroz dikin. Ew Newroza ku gelê Kurd diyarî însaniyetê kirî, cejnekî herî qedîm a dîroka însaniyetê ye. Newroza ku bûyî sembola berxwedana li hemberî Dehaqê zalim, bi hezaran salane ji aliyê gelên Mezopotamya, Îran, Anatolya, Qefqasya û Rojhilata Navîn ve tê pîrozkirin. Em jî carek din di hizûra we de Newroza gel, jin û her kesê ku germahiya Newrozê di dilê xwe de hîs dike yên Mezopotamya, Îran, Anatolya, Qefqasya û Rojhilata Navîn pîroz dikin.
GELÊ KURD GELÊ NEWROZÊ YE
Bêguman gelê Kurdistanê afirînerê Newrozê ye û lewma jî germahiya Newrozê di kûrahiya dilê xwe de jiyan dike. Zaliman di dîrokê de gelek caran xwestine gelê Kurdistanê tune bikin. Lê belê her carê jî gelê Kurdistanê bi Newrozê li ber xwe daye û hebûna xwe parastiye. Lewma jî Newroz ji bo gelê Kurdistanê bûye sembola yekîtî, hevgirtin û azadiyê. Gelê Kurd bi Newrozê xwe afirandiye û azad kiriye. Ji ber vê rastiyê jî Rêber Apo dibêje; “Gelê Kurd, gelê Newrozê ye. Heya ku Newroz hebe, ev gel tune nabe.” Ev rastiya dîrokî îspat bûye. Em di hizûra we de carek din Newroza gelê Kurdistanê yê berxwedêr pîroz dikin.
Di roja me ya îro de, kesayetên dîrokî û kêliyên dîrokî yên ku bûne sedem ku, Newroz ji nû ve zindî bibe û heta îro were çêbûne. Rêber Apo, bingehê PKK’ê di rojek Newrozê de avêt. Kawayê Hemdem, roja Newrozê derket û çalakiya dîrokî pêş xist. Li hember Dehaqên zalim yên ku dixwestin gelê Kurd tune bikin, bi çirûskek biçûk tarîtî qelişand û Newroz carek din vegerand cewherê wê yê dîrokî. Lewma jî Mazlûm Dogan bû Kawayê Hemdem yê dîroka Kurdistanê. Ew çirûska 43 sal beriya niha Kawayê Hemdem Mazlûm Doxan pêxistî, îro di dil û ruhê milyonan de gur bûye, geş bûye û rêya wan rohnî dike. Dema ku em vê roja wetedar û xweşik pîroz dikin, divê em şehîdên xwe yên ku bedena xwe bi agirê Newrozê re kirin yek û ev pêtên agirê azadiyê yê Newrozê heta roja me ya îro anîn ji bîr nekin. Bi van hestan em Mazlûm Dogan û şopdarên wî Zekiye, Rahşan, Ronahî û Berîvanan û hemû şehîdên şoreş û demokrasiyê bi bîr tînin û rêzdariyên xwe pêşkêş dikin.
Ew têkoşîna PKK’ê bi ruhê Newrozê dayî destpêkirin, bûye sedemê avakirina yekîtiya gelê Kurd. Di vê yekê de tevlîbûyîna gelê Başûr a tekoşîna azadiyê jî rolek pir mezin lîstiye. Ewladên Başûrê Kurdistanê yên wek Dr. Sîrwan, Diyar Xerîb (Helmet), Viyan Soran, Mamoste Şemal, Raûf Akreyî, Alî Şaban Amediyê, Sadik Omer û her wiha hezaran şehîdên qehreman bûne stûnên bingehîn ên têkoşîna azadiya Kurdistan û yekîtiya netewî. Divê em bîranînên wan yên hêja, jiyan bikin û bidin jiyankirin.
ÇARESERIYA KRÎZAN CIVAKA DEMOKRATÎK E
Îsal, Banga Aştî û Civaka Demokratîk a Rêber Apo, wateyek nû li Newrozê bar kir. Em dibînin ku gelê Kurdistanê, bi hêz û morala ku ji banga Rêber Apo girtî, li her derê Newroza xwe bi coş û kelecanek mezin pîroz dike. Banga Aştî û Civaka Demokratîk, bangek dîrokî ye. Manîfestoya azadiyê ya serdemê ye. Rêber Apo bi vê bangê ji gelê Kurdistan, Rojhilata Navîn û însaniyetê re asoyek nû daye çêkirin. Azadiya gelan, jinan û azadbûna jiyanê bi xwe gihandina wê asoya Rêber Apo pêkan e. Rêya ji şer, zext, talan, kaos û krîza modernîteya kapîtalîst derketinê, civaka demokratîk e. Em li vir, di hizûra we de, hezkirin, rêz û silavên xwe ji bo Rêber Apo dişînin. Rêber Apo, zêdeyî 50 salan pêşengiya têkoşîna me dike û herî dawî jî bi banga xwe asoyek nû ji bo me afirand. Em Newroza Rêber Apo pîroz dikin.
Êdî tehamûla gelê me ji esareta fizîkî ya Rêber Apo nemaye. Êdî divê pergala êşkencê ya Îmraliyê bi dawî bibe, Îmrali ji holê were rakirin, Rêber Apo demildest azad bibe. Divê ji bo vê yekê em li her derê têkoşînê bilind bikin û vê xwestekê ji her demê zêdetir bînin ziman. Em sala 2025’an bikin sala azadiya fizîkî ya Rêber Apo. Li ser vî esasî, bi hest û baweriya azadiyê we bi rêzdarî silav dikin û Newroza we pîroz dikin.
Newroz Pîroz Be!
Bijî Newroz!”
