Partiya Jiyana Azad a Kurdistanê (PJAK) têkildarî êrişa li ser Komeleya Zehmetkêşan a Kurdistanê-Îranê daxuyaniyek da, ji malbatên qurbaniyan û gelê Kurd re sersaxî xwest.
Daxuyaniya PJAK’ê bi vî rengî ye:
“Di êrişa fuzeyî ya hovane ya vê sibehê (17’ê Tîrmeha 2026’an) de ku ji aliyê dewleta Îranê ve li ser kampên Komeleya Şoreşgerî ya Zehmetkêşên Kurdistana Îranê li nêzî Zirgiwêze hate kirin, 9 pêşmergeyên Komeleyê şehîd bûn. Meclîsa Partiya Jiyana Azad a Kurdistanê (PJAK) vê êrişa terorîstî bi tundî şermezar dike, sersaxiyê dide malbatên serbilind ên wan 9 şehîdan û hemû gelê Kurdistanê.
Ev çalakiya terorîstî ku dewamiya siyaseta qirkirina gelê Kurd e, nîşaneya tirsa kûr a rejîmê ya li hember vîna azadîxwaziyê ye. Xwîna wan 9 pêşmergeyên ku di vê êrişa hovane de jiyana xwe feda kirin, careke din girîngiya yekîtiya neteweyî û têkoşîna hevpar a li dijî siyasetên dîktatorî û terorîstî yên rejîma Komara Îslamî nîşan dide.
Li gel hevxemiya me ya kûr ji ber vê karesatê, em radigihînin ku rêya azadiya Kurdistanê bi xwîna şehîdan geştir dibe û xebata rewa ya gelê me heta serketina teqez wê dewam bike.”
