Raportora Taybet a Neteweyên Yekbûyî ya Îranê Mai Sato bertek nîşanî redkirina daxwaza lêkolîna edlî ya girtiya siyasî û erkdara alîkariya mirovî Pexşan Ezîzî ji aliyê Dadgeha Bilind a Îranê ve da.
Mai Sato li ser X’ê ji bo Pexşan Ezîzî peyamek belav kir û wiha got: “Darvekirina Pexşan Ezîzî wê qanûnên mafên mirovan ên navneteweyî binpê bike.” Mai Sato banga betalkirina biryara darvekirinê kir.
Pexşan Ezîzî di Tebaxa 2023’yan de hate girtin û meha Tirmehê ya borî di encama darizandina li Tehranê hat kirin de bi sûcê “li dijî dewletê serî hildaye” cezayê darvekirinê lê hate birîn.
Komên mafên mirovan diyar dikin ku sûcdarkirinên li ser wê bi armanca siyasî ye û bi alîkariyên wê yên mirovî re girêdayî ye ku piştî êrîşa DAÎŞ’ê ya li dijî Bakur û Rojhilatê Sûriyeyê alîkariya jin û zarokan kir.
Parêzerê Pexşan Ezîzî Emîr Reîsiyan di daxuyaniya xwe ya li ser X’ê de anî ziman ew ê ji bo betalkirina biryara darvekirinê daxwaza ji nû ve darizandinê bikin û wê serî li Serokê Erka Darazê ya Îranê bidin.
Rêxistina Efûyê ya Navneteweyî jî bi tundî rexne li biryarê kir û wiha got: “Divê rayedarên Îranê biryara darvekirinê ya li ser erkdara alîkariya mirovî Pexşan Ezîzî ku di encama darizandineke neadil de hatiye dayîn rawestînin.”
Cîgira Dîrektorê Rêxistina Efûyê ya Rojhilata Navîn û Efrîkaya Başûr Dîana Eltahawy jî destnîşan kir ku Pexşan Ezîzî ji aliyê rayedaran ve hatiye êşkencekirin û di binçavan de rastî tundiya zayendî hatiye.
