Serokê Komîteya Têkiliyên Derve ya Senatoya Dewletên Yekbûyî yên Emerîkayê (DYE) û Senatorê Idaho’yê Jim Risch nerazîbûn nîşanî sûcên giran ên hêzên rejîma Şamê da ku li taxên Kurdan ên Helebê kirin. Risch diyar kir ku nabe hovîtiya li sivîlan hatiye kirin bê nixumandin û ji bo hesabpirsîna ji berpirsyaran bang kir.
Risch li ser hesabê xwe yê X’ê (Twitter a berê) daxuyaniyek da bi van gotinan fikarên xwe yên li ser bûyerên hefteya dawî yên li Helebê anî ziman: “Helwesta ku hêzên çekdar li Helebê nîşan dan, min bi kûrahî xist nava fikaran. Yên ku ev çalakiyên qirêj kirin divê teqez hesab ji wan bê pirsîn. Piştî şerê bi salan wezîfeya rêveberiya nû û hêzên wê yên çekdar ên Sûriyeyê parastina mafên bingehîn ê gel e; ne binpêkirina wan e.”
