Bi sedan şêniyên kantona Dêrazorê, rûspiyên eşîran, endamên saziyên sivîl, leşkerî, partiyên siyasî, rêxistinên jin û ciwanan bi meşeke girseyî Komploya Navneteweyî ya li dijî Rêber Apo şermezar kirin.
Girseya şermezarkirina komployê bi bilindkirina wêneyên Rêber Apo û vekirina pankartên “Em ê roja reş veguherînin roja azadiya Rêber Apo” ji pêşiya avahiya Meclisa Rêveber a Kantona Dêrazorê ya li herêma Sebha Kîlo dest bi meşê kir. Di meşê de dirûşmên “Bê Serok jiyan nabe” û “Bijî Serok Apo” hatin berzkirin.
Girse nêzî 2 kîlometreyan meşiya û li Pira Salihiyê ya heman herêmê sekinî û mîtîngek hat lidarxistin.
Piştî deqeya rêzgirtinê, şêwirmendê Rêveberiya Xweser a Kantona Dêrazorê Şiyar Mihemed axivî. Şiyar Mihemed anî ziman ku ji bo azadiya fîzîkî ya Rêber Apo divê asta têkoşînê were bilindkirin. Şiyar Mihemed komplo şermezar kir û got: “Komplo ne tenê revandina Rêber Apo bû, lê belê hewldanek ji bo lawazkirina hêviya gelên lêgerînerên azadiyê bû. Ramanên Rêber Apo ji milyonan mirovan re bûne çavkaniya îlhamê.”
Mîtîng bi berzkirina dirûşmên ji bo azadiya fîzîkî ya Rêber Apo bi dawî bû.
