Serokwekîlê Koma DEM Partiyê Sezaî Temellî derbarê geşedanên di rojevê de li Meclîsê civîna çapemeniyê li dar xist.
Sezai Temellî, di destpêka axaftina xwe de bal kişand ser çalakiya karkerên madenê yên Dorukê û bi lêv kir ku karker li bendê ne ku mafên wan pêk were, wezaretên soz dabû karkerên madenê lê soza xwe pêk neaniye û xwest mafê karkeran demildest were bicihanîn.
Sezaî Temelî, anî ziman ku rejîma Îranê li dijî Kurd û gelên Îranê bi sepanên darvekirinê mafên mirovan binpê dike û bang li sazî û dezgehên navneteweyî kir ku pêşî li darvekirinan bigirin.
Sezaî Temellî, bal kişand ser pêşniyar qanûnên li Meclîsê û wiha got: “Pêşniyarên muxalefetê her tim paşguh dikin. Îro jî dê ji bo Heyva Sor bêtir bikaribe konan bifiroşe li ser pêşniyar qanûnan bixebitin. Heyva Sor bûye saziyeke bazirganiyê. Me di erdhejê de jî dît. Piştî erdhejê çend seatan kes neçû alîkariyê û bi hezaran kes ji ber alîkarî negiheşt wan jiyana xwe ji dest dan. Heyva Sor jî piştre çû kon firotin. Tevî vê rezîltiyê jî niha ji bo peywîra Heyva Sor bêtir fireh bibe li ser pêşniyarqanûnê dixebitin.”
Sezai Temellî, destnîşan kir ku enflasyon bi ser ji sedî 40’î re ye û wiha pê de çû: “Krîza aborî her ku diçe mezin dibe. Birçîbûn û xîzanî zêdetir dibe. Welatî ji ber betaliyê nikarin debara xwe bikin. Sermayedar mezin dibin lê qirkirina xwezayê, kêdxwarî û birçîbûn jî zêde dibin. Welatî edaletê dixwazin. Ji bo wê jî bendewariya gel ji Meclîsê heye. Li Meclîsê jî pakêta 12’emîn a darazê dê were nîqaşkirin. Lê di wir de jî tu tiştekî ku ji bo bendewariyên gel bin û daxwaza wan bibersivîne tune ye. Bendewariya gel pêkhatina mafê hêviyê bû. Berdana girtiyên nexweş bû. Lê şûna ku ji van bendewariyan re bibin bersiv hewl didin mafên nafaka ya jinan jî desteser bikin û ceza bidin zarokan. Her ku pakêteke edaletê derdixînin bêedaletî zêdetir dibe. Ji bo wê jî divê ji bendewariyên gel re bibin bersiv.”
Sezaî Temelî, anî ziman ku divê qanûnên taybet demildest bên çêkirin û wiha got: “Divê desthilat demildest gavên pêwîst biavêje. Civak li benda çêkirina van qanûnan e. Ji ber ku sedema van krîzên aborî û edaletê jî pirsgirêka Kurd e. Divê ji bo wê jî demildest şert û mercên azad ên birêz Ocalan pêk werin û qanûnên pêwîst bên çêkirin. Lê tevî ku em li benda van gavavêtina ne jî ji aliyê din vê bi mudaxileya li dijî CHP’ê krîza siyasî kûrtir dikin. Bi rakirina parêzbendiya parlamenterên HDP’ê ev krîza siyasetê dest pê kir û niha jî didome. Divê CHP’ê çareseriyeke di nav xwe de peyda bike. Bingeha pirsgirêka demokrasiyê pirsgirêka Kurd e. Ji bo wê jî divê desthilat micid nêzî meseleyê bibe. Gelek kes dixwazin biçin Girava Îmraliyê û serdana birêz Ocalan bikin. Divê qanalên hevdîtina bi birêz Ocalan re jî zêde bibin.”
Sezai Temelli, di dawiya axaftina xwe de ragihand ku dê di 13-14’ê Hezîranê de li Stenbolê “Konferansa Di Sedsala 2’yemîn De Veguherîna Demokratîkbûyîna Komarê” were lidarxistin û got ku ev konferans dê bandoreke erênî li ser pêvajoyê bike.
Sezaî Temellî, li ser pirsên rojnamevanan diyar kir ku piştî civîna wan a Desteya Rêveberiya Navendî ew dê plansaziya siberojê bikin û got ku ji bo pêkanîna aştiyê hewcehî bi qanûnan heye û divê demildest qanûn bên çêkirin.
