Tevî ku derheqê Îrfan Yilmaz de ATK’ê rapora ‘’nikare li girtîgehê bimîne’’ daye jî Serokatiya Desteya Îdarî û Çavdêriyê ya Girtîgeha Hejmar 2 a Marmarayê red kiriye ku derbasî Saziya Înfazê ya Cezayê Derve bibe.
Hasan Togan ê wasiyê Îrfan Yilmaz ji ANF’ê re axivî û diyar kir ku Îrfan Yilmaz ê girêdayî kursiya biteker û nikare bi tena serê xwe bijî, bi awayekî fermî bi mirinê re rû bi rû hatiye hiştin.
Taloqkirina înfaza Îrfan Yilmaz a ji ber pirsgirêkên tenduristiyê, li gel biryara redkirinê ya Bûroya Înfaz û Serdozgeriya Komarê ya Bakirkoyê hatibû astengkirin. Li ser vê yekê Serokatiya Desteya Îdarî û Çavdêriyê ya Girtîgeha Hejmar 2 a Marmarayê jî daxwaza taloqkirina înfaza Îrfan Yilmaz red kir.
‘BES JI BER KU DAXWAZNAME NEDAYE KU DERBASÎ KAWÎŞA SERBIXWE BIBE ÎNFAZA WÎ ŞEWITANDIN!’
Hasan Togan di destpêka axaftina xwe de da zanîn ku Serokatiya Desteya Îdarî û Çavdêriyê ya Girtîgeha Hejmar 2 a Marmarayê biryara xwe ya redkirinê nû ragihandiye û ev yek anîn ziman: ‘’Li vir tişta ecêb ew e ku ji ber ku Îrfan Yilmaz daxwaznameya ku derbasî kawîşa serbixwe bibe nedaye, daxwaza taloqkirina înfazê hatiye redkirin. Di gel ku rapora ATK’ê li holê ye jî esasgirtina girteya Muduriyeta Polîsan a Sariyerê û biryara Serokatiya Desteya Îdarî û Çavdêriyê sepaneke skandal e. Diviya Îrfan Yilmaz di 17’ê Cotmeha 2025’an de bihata tehliyekirin. Lê belê ji ber ku dema ev li girtîgehê nexwestiye biçe kawîşa serbixwe înfaza wî hate şewitandin û dîroka tehliyekirina bişert ji 15’ê Mijdara 2027’an re hatibû taloqkirin. Baş e wê li kawîşa serbixwe bi tena serê xwe çawa bijî?’’
‘MIL Û LINGÊN WÎ NAGIRIN, TIM HEWCEYÎ ALÎKARIYÊ YE!’
Hasan Togan di dewama axaftina xwe de diyar kir ku Îrfan Yilmaz a niha di bin şert û mercên dijwar de li girtîgehê tê girtin û got: ‘’Îrfan Yilmaz girêdayî kursiya biteker e. Bi tu awayî nikare mil û lingên xwe bi kar bîne. Ji bo pêdiviyên sereke yên weke rabûn, çûna daşîr, xwarin-vexwarin, serşûştin û paqijiyê tim hewceyî alîkariyê ye. Dema ku derve kursiya biteker a otomatîk bi kar dianî û dikarî biçe li her derî. Lê belê girtîgehê ew kursiya otomatîk nestand li şûna wê ya destan dan. Ew bi xwe jî nikare wê kursiyê bi kar bîne. Ji ber ku nagere jî laşê wî werimiye.’’
‘EV YASAYÊN XWE JÎ BI CIH NAYÎNIN’
Hasan Togan di dawiya axaftina xwe de bertek nîşanî biryara Muduriyeta Polîsan a Sariyerê da û ev yek anîn ziman: ‘’Însanekî ku ji sedî 96 astengdar û nikare rabe ser xwe wê çawa ji bo civakê bibe talûke? Însanekî ku heya 60 saliya xwe bi vî rengî nebûye talûke wê piştî 60 saliya xwe bibe talûke? Me ev yek fêm nekir. Tu kes jî fêm nake. Yanî bi awayekî fermî Îrfan Yilmaz bi mirinê re rû bi rû dihêlin. Em ê destûrê nedin vê yekê û ji bo tehliyebûna wî çi ji destê me tê em ê bikin. Yasaya tehliyekirina girtiyên nexweş jî heye. Lê belê ev yasayên xwe jî bi cih nayînin. Îrfan Yilmaz ji ber ku nexwestiye derbasî kawîşa serbixwe bibe, nayê tehliyekirin. Li gel niyetxwendina polîsan însan tên rehîngirtin. Îdareya nexweşxaneyê jî dozgerê înfazê jî ne rapora ATK’ê berovajî wan girteyên polîsan ên xwe naspêrin tu tiştan esas digirin û ev yek sûc e.’’
