Li Stenbolê xwendekarên zanîngehê di salvegera duyemîn a erdheja 6’ê Sibatê ya ku navenda wê Mereşê bû û bandor li 11 bajaran kir, li Beyazîtê çalakiya bîranînê li dar xistin.
Çalakiya ku di bin dorpêça polîsan de hat lidarxistin de pankartên “Erdheja 6’ê Sibatê: Me ji bîr nekir, em ê hesab bipirsin” û “Em ji bîr nakin, efû nakin” hatin hilgirtin.
Di çalakiyê de dirûşmên, “Ne karesat, rant dikuje”, “Ciwan wê ji qatilan hesab bipirse”, “Roj wê were, AKP wê hesab bide gelan” hatin berzkirin.
Li ser navê xwendekarên zanîngehê Volkan Atmaca daxuyanî xwend û got, “Li gorî çavkaniyên fermî 53 hezar û 537 kes hatin qetilkirin û 107 hezar û 213 kes jî birîndar bûn. Me hemûyan bi hev re şahidiya vê wêraniyê kir. Bi milyonan mirov mehkûmî jiyana avahiyên bêewle hatin kirin û bi wêraniyeke mezin re rê bi rû man.”
Atmaca anî ziman ku dewletê ji bo erdhejê tedbîr negirt, şîrketan ev wêranî ji bo xwe weke derfeta dewlemendbûnê bi kar anîn û wiha domand: “Ev pergala ku ji bo çend kurtêlxuran hatiye avakirin divê were hiweşandin. Bi vê hişmendiyê em ê hesab ji berpirsên erdheja 6’ê Sibatê bipirsin. Em ê bi hêza hevgirtinê ya gelan vê pergalê hilweşînin û hevgirtina xwe xurt bikin.”
