Li gorî biryara ku di civîna Encumena Parêzgeha Kerkûkê de hat girtin, Mihemed Seman wekî parêzgerê nû yê Kerkûkê hat hilbijartin. Beriya civînê, parêzgerê heyî Rêbwar Teha û alîkarê parêzger ê yekem Yawiz Hemîd ji peywirên xwe îstifa kirin.
Di dengdana ku li meclîsê hat kirin de, biryar hat girtin ku Serokê Ensiya Tirkmen Mihemed Seman bibe parêzger.
Berdevkê Yekîtiya Niştimanî ya Kurdistanê (YNK) Karwan Gezneyî, derbarê pêvajoya guhertina Parêzgariya Kerkûkê de daxuyaniyeke çapemeniyê da û helwesta partiya xwe anî ziman.
Gezneyî di daxuyaniya xwe de got: Em partiyeke rasteqîn in. Em pabendî peymana ku me kiriye ne. Ji bo me tu peywir heta hetayê ne mîrateyeke siyasî ye. Guhertina peywirê pêvajoyeke demokratîk e.
Karwan Gezneyî her wiha derbarê nêzîkatiya boykotê ya PDK’ê de jî ev tişt anîn ziman: Aliyên ku li dijî vê guhertinê derdikevin, dema Rêbwar Teha hat ser peywirê çima nehatin û dengê xwe nedan? Heke ew alî berê bi me re bihata, û li hev bikira û dengê xwe bida birêz Rêbwar, wê demê me yê îro guhertina parêzgeriyê jî bi hev re bikira. Lê ji ber ku nehatin, em neçar man bi van re li hev bikin. Em bi vê peymanê serbilind in. Di pêşerojê de dê dem nîşan bide ka kî baş e û kî xirab e.
