Li Amedê amadekariyên ji bo zivistanê dawiya mehên havînê destpê kir. Îsal ji ber zêdebûna buhayê zebzeyan zêde nikare bê kirin. Jinên ku îsot, bacanê reş û firingiyan hişk dikin, dixin qewanozan, an jî dibirêjin û ji zivistanê re hiltînin, anîn ziman ku li gorî salên beriya niha nekarîbû zêde zebzeyan bikirin. Jinan diyar kirin ku ew li bazarê geriyan û bi buhayekî guncaw tiştek nedîtine, lewma pereyê wan têrê nekiriye ku bazara xwe li gorî pêwîstiyên xwe bikin.
BUHAYÊ ZEBZEYÊ ZÊDE BÛ
Li Tirkiyeyê enflasyon her bilind dibe. Vê yekê bandor li bazarê jî kir. Li gorî daneyan, buhayê bacanê reş li marketê di 1’ê Adara 2025’an de 85,38 TL/kg bû, di 12’ê Sibata 2026’an de bû 116,79 TL/kg. Bi vî rengî buhayê bacanê reş di asta ji sedî 36,8 de zêde bû.
Îsota ji bo dagirtinê ku kîloya wê Tebaxa 2023’an 17,95 TL bû, di Tebaxa 2026’an de bû 150 TL û bi vî rengî ji sedî 736 zêde bû. Di heman demê de buhayê kîloyeke bacanê reş 13,95 TL bû, li hin deveran bû 500 TL.
‘ZEBZEYA KU BI KÎSAN DIKIRÎ, DAKET KÎSIKAN’
Şukran Yildenîz ku amadekariyê ji zivistanê re dike, anî ziman ku ji ber krîza aboriyê hêza wan a kirîna zebzeyan her sal kêm bûye. Şukran Yildenîz got, “Em her sal van mehan dest bi amadekariyên zivistanê dikin. Meha Îlonê jî bi dawî dibe. Em zebzeyan hişk dikin, dixin qewanozê yan jî bacanê reş dibirêjin û bi vî rengî amadekariyê ji zivistanê re dikin. Em vî karî bi hev re dikin. Gel, an jî şêniyên taxê li hev kom dibin û alîkariyê bi hev re dikin. Zivistan bi xwarina van derbas dibe.”
Şukran Yildenîz diyar kir ku berê amadekariyên wan ên ji bo zivistanê bi hefteyan dewam dikir û got, “Berê me bi kîsan zebze dikirî. Bi taybetî îsot, bacanê reş û firingî. Ji ber krîza aboriyê kîsên ma daket kîsikan. Em li bazarê yek bi yek li dezgehan digerin û li ya herî erzan digerin. Ji bo me qurişek jî êdî girîng e.”
‘EM Ê ZIVISTANÊ JÎ BIKEVIN NAVA FIKARA HAVÎNÊ’
Şukran Yildenîz ragihand ku bihabûn ne tenê bi berhemên xurekê ye û axaftina xwe bi vî rengî dewam kir, “Ne tenê li bazarê, fatûreyên têne malê, pêwîstî, her tişt biha bûne. Em li zivistanê difikirin û vê dikin, zivistanê jî em dikevin nava fikara havînê. Sala bê wê hîn biha bibe. Ji ber vê jî dibe ku sala bê em ê hîn kêmtir çêbikin.”
‘PAR SÊ KÎ BÛ, ÎSAL DAKET KÎSEEKÎ’
Şukran Işik jî got, di amadekirina zivistanê de ew bi giranî îsot, bacanê reş û firingiyan dixin qewanozan û diyar kir ku buhayê zêde kir ku amadekariya wan a ji bo zivistanê kêm bibe.
Şukran Işik got, “Dema yek çêdike, jin hemû tên piştgiriya wê dike. Mirov gelekî diweste, karekî zehmet e. Em amadekariya xwe ya ji bo zivistanê her salê dikin. Lê belê ji ber ku her sal buhayê zebze zêde dibe, rêjeya amadekariya me jî kêm dibe. Mînak min par 3 kîs zebze kirî, lê îsal ji ber bihabûnê karîbû tenê kîsekî bikire.”
