Bi hatina biharê re gundên Binarê Qendîlê rengê xwezayê li xwe pêçane. Piştî zivistana dijwar, hatina biharê li van gundan jiyanê geş dike.
Ev gundên ku şahîdî ji gelek têkoşînên azadiyê re kirine û malevaniya sedan şoreşgeran kirine, ji aliyekî jiyana xwe ya rojane didomînin, ji aliyekî ve jî ji ber şahidî û malevaniya ku li têkoşerên Kurdistanê kirine re dilşad in.
DEMA BEDEWIYA BIHARÊ BI HEYBATA ÇIYAN RE DIBE YEK
Gundê Rizgê jî yek ji van deverên dîrokî yê Binarê Qendîlê ye ku ji sedsala borî heya roja îro bûye yek ji stargeha şoreşgeran. Li vî gundî hê jî kevneşopiya pîr û kalan dimeşe.
Ev gund li herêma Şehîd Harûn a Binarê Qendîlê ye, li ser sînorê di navbera Başûr û Rojhilatê Kurdistanê de niştecîh bûye. Dema avahî, mirov, xweza û jiyana vî gundî bi heybeta çiyayên derdora wê re dibin yek, dîmenekî mirovan mest dike derdikeve pêşberî me. Gundê Rizgê, bi hawîrdor û xwezaya xwe ji bo gelê herêmê dibe seyrangeh û cihê jiyanê.
Yek ji şênîyê gundê Rizgê Mam Birahîm, di derbarê dîrok û kevneşopiya gund, rêkûpêk kirina jiyana rojane de ji ajansa me re axivî. Mam Birahîm bal kişand ser ku xelkê gund rojane bi ajaldariyê re mûjil e, zivistan û havînan ev karê rojane her berdewam dike û got: “Ne tenê bi ajaldariyê re, ji bo debara xwe bikin em ji karên zîraetê re jî mijûl dibin û ji bo vê her di nava liv û tevgerê de ne.”
Mam Brahîm, tîne ziman ku ji ber pirsgirêka xirabiya riyan, gundî ji bo çûndin û hatinê hin zehmetiyan dikşînin û da ku şert û mercên jiyanê zêde zahmet nebin û xizmetgûzarî pêş bikevê bang li berpirsyaran dike. Tevî hemû zehmetiyan jî Mam Birahîm, bi van gotinan bextewariya xwe tîne ziman: “Jiyana gund çêtire ji jiyana bajaran.”
JIN BEDEWIYA JIYANÊ BERÇAV DIKE
Di nava ev xweşikbûn û heybeta gund de ya ku bedewiya jiyanê berçav dike jî rengê jinê ye. Hemû karên rojanê yên gund bi keda dayikan pêk tên. Di gundê Rizgê de jin komkirin û avakirina kar û barên jiyanê de xwedan rist in û rola pêşengtiyê hildigrin ser milên xwe.
Dayikên gundê Rizgê anîn ziman ku sedsal jî derbas bibin jiyana gundê xwe razî ne û gotin: “Ji ber jiyana gundê me, ji bo me mejûyekî kûr yê dîrokî ye.”
HEBÛNA GERÎLA ARAMIYA JIYANÊ YE
Her wiha dayikan bal kişandin ser ku ji ber hebûna gerîla ya li Qendîlê xwe di nava ewlehiyê de dibînin û wiha dawî li axaftina xwe anîn: “Ger ku di nava aramî û parastinê de em jiyana xwe didomînin bi hebûna gerîla ve girêdayî ye.”
