Fermandariya Giştî ya YPJ’ê di daxuyaniya xwe ya bi boneya 8’ê Adarê de wiha diyar kir:
“Em 8’Adarê Roja Jinên Kedkar a Cîhanê li hemû jinên têkoşer, kedkar û berxwedêr, her wiha li lêgerên azadiya jinan Rêber Apo ku eşqa jiyaneke azad xiste dilê me, pîroz dikin. Hemû jinên ku ji destpêka dîrokê ta roja îro li hember her cure destdirêjî, îşkence û tundiyê serî rakirin û li ber xwe dan, di hafizeya civakê de bûn cihê bîrewerî û serbilindiyê, silav dikin. Clarayê bi têkoşîna xwe, Hîpatyayê bi zanista xwe, Newal El Sadawî bi pênûsa xwe, Sakîne Cansiz bi şerkeriya xwe bûn rênîşanên rêya azadiya jinan. Di şexsê van jinên qehreman de em şehîdên cenga giran a Rojava fermandar şehîd Arjîn Kobanê, Ronahî Yekta, Bêrîtan Şoreş, Jînda Botan, Arjîn Efrîn, Bêrîtan Ereb û hemû şehîdên azadiya jinan bi minet û rêzdarî bi bîr tînin û bejna xwe li ber dilwêrekiya wan ditewînin. Weke Yekîneyên Parastina Jin YPJ çawa ku me li ser hîmê parastina jin û gelan xwe bi rêxistin kir û 14 sal bi têkoşîn, şer û fedekariyeke mezin li ber xwe da, em ê ji vir û şunde jî liberxwe bidin û sala 2025’an veguherînin sala azadî, aştî û wekheviya gelan.
Çanda berxwadanê ya 8 Adarê îro li Bakur û Rojhilatê Sûriyeyê di pêşengiya YPJ’ê de dewam dike. Di hemû qadên jiyanê de bi fedekarî, lehengî û berxwedaniyeke bêhempa jin li berxwe didin xwe û civaka xwe diparêzin. Li ser vê xakê bi hezaran canên bedew di oxira têkoşîna azadiyê de bi lehengî şer kirin û şehîd bûn. Ji her aliyê cîhanê û ji çar perçeyê Kurdistanê jin ref bi ref ber bi şoreşê ve herkirîn û bi wêrekiya xwe destan nivîsandin. Ev xakên berxwedêr bi ruhê netewa demokratîk, pîrozî li ser pîroziya xwe zêde kir. Careke din hemû bawerî, komên etnîk û mirovên ji rengên cuda ji nûve hevdû hembêz kirin û şahidî ji vê têkoşîna dîrokî re kirin. Bi bawerî, zanist, îrade û hêza jinan wê ev têkoşîna domdar, bi serkeftinê tacîdar bibe.
Jina ku bi paradîgmaya Rêber Apo xwe ava dike û ronî dibe, çawa ku duh ji bo înşakirin û parastina civaka demokratîk li berxwe da, îro û sibe jî wê mîsyona pêşengiyê bigre ser milê xwe. Ev jî bi pêşeniya Yekîneyên Parastina Jin YPJ’ê ve pêkan dibe. Di van kêliyên ku şer lê didome, di kêliyên ku em cejna xwe ya 8’ê Adarê pîroz dikin, jinên têkoşînvan, hevrêyên me di qadên cengê de bi bombardûmaneke giran re rû bi rû tên. Dewleta Tirk û çeteyên wê bi awayekî rojane bi rêka balafirên şer, balafirên bêmirov, bi tang û topên xwe êrişê qadên me dike. Ango ruhê berxwedêr ê 8’ê Adarê îro ji herdemê zêdetir bilind bûye û êrişên dagirkeriyê vala derdixe.
Banga Rêber Apo coş û kelecaneke mezin di dilê tevahî gel û jinan de avakir. Ev kelecan bi ruhê 8’ê Adarê re bilindtir dibe. Em banga Rêber APO watedar û bi nirx dibînin, guftûgoyên ku îro der barê çareseriya pirsgirêka Kurd de tên meşandin, ji nêz ve dişopînin. Îro dewleta Tirk bi êrişên xwe yên giran ên li ser bendava Tişrînê û pira Qereqozaqê asta dilsozî û samîmiyeta xwe ya li hember pêvajoyê nîşan dide.
Li Sûriyeyê di nava 14 salên dawîn de êş û birînên giran hatin jiyîn, ev êşên civakê ne pêkane bi HTŞ û serkêşê wê Colanî re werin dermankirin. Hikumeta ku xwe bi xwe li Şamê xwe ava kir nikare bi hişmendiya cîhadîst û selefî pirsgirêkan çareser bike. Nikare hilweşandin û êşa 14 salan ji holê rake. Dijberî wê îro li seranserî Sûriyeyê êriş, tundî û qirkirin bi awayekî sîstematîk tê meşandin. Gelê Durzî rastî zext û êrişan tê, gelê Elewî bi qirkirinê re rû bi rû dimîne û gelê Kurd tê înkarkirin. Her wiha gelê Ereb bê vîn û bê çare tê hiştin. Hişmendiyeke ku her kesî neçarî bêdengiyê û serî tewandinê dike, çawa ku nikare pirsgirêkan çareser bike, nikare xwe ji aqûbeta hatiye serê rejîma Baas jî xilas bike. Lewma yên ku heman rê û rêbazê weke çareserî ji xwe re esas bigrin, dawiya wan jî wê weke dawiya rêjîma Baas be.
Lewma jî ji bo demokratîkbûna Sûriyeyê, em amade ne bi erka xwe rabin. Di vê derbarê de çareserî û projeyên me jî amade ne. Pêdiviya civakê bi demokrasî, wekhevî û azadiyê heye. Bi pergaleke ku hemû reng, hemû ziman û hemû baweriyan di nava xwe de dihewîne, Sûriye dikare li ser bingehek demokratîk jinûve were avakirin. Sûriyeke bi vî rengî hêvî û daxwaza her kesî ye. Pêşenigya vê jî wê jin bikin, ji ber ku qurbaniyên herî mezin ên vî şerî jin in û jin dikarin dawî li vî şerî bînin.
Em ne tenê hêza parastina bakur û rojhilatê Sûriyeyê ne, di heman demê de em parêzvanên hemû gel, bawerî, ziman û çandên li tevahî Sûriyeyê ne. Lewma heya ku êrişên hovane li ser gelê me yê Bakur û Rojhilatê Sûriyeyê hebin, ne pêkane kes ji me çek berdanê hêvî bike. Di dema ku jin, gelê me û ev xak di bin gef û xeteriyan de be, mafê me yê herî rewa, mafê xweparastinê ye. Mafê xweparastinê, mafê jiyanê ye, kes nikare jinan û vî gelî neçarî bê parastinê bike.
Careke din bi ruhê 8’ê Adarê, bi çanda domdar a berxwedana jinan em biryardarî û dilsoziya xwe ya bi hemû jinan re raber dikin û em bawer in dê sala 2025’an bibe sala hevgirtin û têkoşîna mezin a hemû jinên cîhanê. Ev têkoşîn wê me ber bi serdema civaka demokratîk a bi pêşengiya jinan ve bibe. Bi vê baweriyê em careke din 8’ê Adarê roja berxwedan û cenga azadiyê li tevahî jinan pîroz dikin.
Bijî 8’ê Adarê
Bijî Rêber Apo
Jin Jiyan Azadî”
