Li bajarê Kobanê yek ji çinîna sereke ya ji dexil û danan, çandiniya Kunciyan e. Kuncî piştî rakirina mewsima Ceh û Genim tê çandin, avdan û meha Mijdarê jî tê rakirin. Li Kobanê û gundewarên wê bi giranî Ceh, Genim, Nîsk, Colik, Kemûn, Nok, Kuncî û hwd. tên çandin. Ew berhem weke berhemên sereke ku salane bi hektarên erd ên mezin tên çandin, hemû cotkar li ser axa xwe, çandiniya xwe dikin û debara jiyana xwe pê dikin.
Li bajarê Qinê yê Kobanê, werza Zivistan, Tivir, Bextenûz, Reşad, Silik, Sebanix, Pîvaz, Sîr, Cercîr û hwd. tên çandin û di werza havînê de Bacanên Sor û Reş, Patata, Îsot, Xiyar û Xitî tên çandin.
Cotkar Qadir Şêx Nebî anî ziman ku îsal berhema Kunciyan ji her salê kêmtir e û got: “Niha Mewsim hinekî baş e, lê dîsa ne weke salên bihurî ye. Îsal berhem gelekî kêm jê tê. Di heman demê de jî kesên ku tên xizmeta Kunciyan dikin û yên radikin, heqdestê wan ê rojane jî bi miqdarekî pir tê dayîn, ew jî bandorê li Cotkar dike. Kuncî di mehên Havînê tê çandin, niha jî ew berhem tên komkirin. Niha tonê Kuncî Nêzî 700-800 Dolarê Emerîkî diçe. Lê îsal berhem gelekî kêm e. Di her hektarekê de nêzî 500-600 Kg jê tê, ew jî gelekî lewaze û bandoreke neyinî dike.”
DESTÊ DAYÎKÊ DI KOMKIRINA BERHEMAN
Berhema Kunciyan yek ji berhemên bi destê dayîkê jî kom dibe. Gelek komên dayîkan hene li şûna komkirina bi Patosan, ew bi destan berhemên xwe kom dikin, paqij dikin û jinûve ew berhemên xwe radikin. Ne tenê kuncî, di her çandiniyê de, bi destê dayîkê ew çandinî tê çandin, avdan û komkirin. Çandiniya dexil û danan li bajarê Kobanê bi awayekî gelekî zêde tê çandin. Ew jî him ji aliyê aborî ve û hem jî ji aliyê komkirina berheman, aliyekî pozîtîv erênî ye.
