Li Awusturyayê, rojeva sereke skandala gendeliyê ye ku di nav Yekîtiya Îslamî ya Tirkî ya Awusturyayê (ATİB) de derketiye holê. Di nav pênc salan de, gelek rêvebirên ATİB’ê bi lêpirsînê re rû bi rû man. Tê îdiakirin ku van kesan pereyên beşê ji bo armancên cuda bikar anîne; ji bo mesrefên taybet, partiyan – di nav de jinên eskort – û ji bo derbaskirina kontrolên navxweyî bi bertîlê.
Sûcdarî tenê bi vê yekê we sînordar nabe. Tê gotin ku dahatiyên ji çavkaniyên wekî pereyên hecê, beşên qurbanê û fonên cenazeyan jî ji bo armancên cuda hatine bikaranîn. Ev mesref di belgeyan de bi şaşîtî wekî “mesrefên mêvandariya îmaman” hatine nîşandan.
Ev bûyer li ser siyaseta Awusturyayê jî bandor kiriye. Tê ragihandin ku rayedarên Awusturyayê niha çalakiyên karmendên dînî yên ji Tirkiyeyê tên şandin û ji nêzîk ve dişopînin. Ev agahî, li se pirsa rojnameya Heute hate parvekirin.
Li gorî nûçeyê du karmendên payebilind ên Diyanetê li Viyanayê ji kar hatine dûrxistin. Sdema fermî wekî “bêdîsîplînî û kêmasî” hatiye ragihandin.
Her wiha jineke karmend jî bi awayek bêdengî ji kar hatiye derxistin; tê îdiakirin ku ev yek ji bo parastina navên din hatiye kirin.
ATİB, bi zêdetirî 60 komele û nêzî 100 hezar endaman, li Awusturyayê mezintirîn saziya çandî ya Tirk e. Ev sazî wekî dirêjkirina rêveberiya Erdoğan li diasporayê tê dîtin. Îmam ji aliyê Diyanetê ve têne tayînkirin û mûçeyên wan jî ji aliyê Diyanetê ve têne dayîn. Bi nûnertiyên dînî yên Tirkî yên li Viyanayê re jî hevkariya karmendan heye. Ji ber vê yekê, ATİB, mîna mînaka DİTİB’ê li Almanyayê, wekî dirêjkirineke rasterast a siyaseta dînî ya Tirkiyeyê li Awusturyayê tê dîtin.
Tê gumankirin ku ATİB, ji sala 2017’an û vir ve, li ser Tirk û Kurdên dijberî hikûmetê agahî berhev dike û ji bo kêmkirina bandora wan tedbîr girtiye.
