Ji bo gerîlayê HPG’ê Şahîn Cîlo (Mazlum Alas) yê ku hatibû ragihandin di 16’ê Kanûna 2023’an de li qada Zapê ya Herêmên Parastinê yên Medyayê şehîd bûye, li navçeya Dêrika Mêrdînê ji aliyê malbata wî ve sersaxî hate danîn. Taziya Şahîn Cîlo bi pêşengiya Komeleya Alîkarî, Piştevanî, Yekîtî û Çandê ya bi Malbatên Kesên di Dergûşa Şaristaniyê de Jiyana Xwe Ji Dest Dane (MEBYADER) bi girseyî hate ziyaretkirin. Di serdanê de ku bi beşdariya bi sedan kesan pêk hat, dirûşmên “Şehîd namirin” hatin berzkirin.
Serdan bi deqeyeke rêzgirtinê dest pê kir. Di serdanê de Hevserokê MEBYADER’ê Salih Kuday axivî û diyar kir ku Kurdan di dîroka têkoşîna xwe de her tim xwe bi pêş ve birine û wiha got: “Em minetdariya xwe pêşkêşî Mazlum Alas û hevalên wî dikin, li ber bîranîna wan bejna xwe ditewînin. Me dixwest ku ew jî îro di nav me de bin û vê pêvajoyê bibînin, lê em dizanin ku bi saya berdêlên wan em gihîştine van rojan. Divê ji nav hemû gelên bindest lehengên wiha derkevin da ku ber bi tunebûnê ve neçin. Ji ber vê yekê em wan careke din bi bîr tînin.”
Piştre Parlamentera DEM Partiyê ya Mêrdînê Bêrîtan Guneş Altin axivî û anî ziman ku Kurdan di dîroka xwe de koletî û bêrûmetî nepejirandiye û got: “Herî zêde jî şehîdên me qebûl nekirin. Gerîlayên li çiyayan qebûl nekirin. Rastiya Kurdistanê ji her kesî bêtir ew dizanin û nas dikin. Îro çavê cîhanê li Kurdistanê ye. Ji ber ku Kurdistan bi dewlemendî, çavkanî û şaristaniya xwe erdnîgariyeke ku rê nîşanî mirovahiyê daye.”
Altin destnîşan kir ku îro têkoşîna Şahîn Cîlo û hevalên wî têkoşîna rastiya Kurdistanê ye û wiha pê de çû: “Divê em ji bîr nekin ku wan ji bo çi têkoşîn dane. Ji bo daxwaz û armancên wan, divê em her roj têkoşîneke mezin bimeşînin û bigihîjin armanca wan. Divê em ji wan û berxwedana wan re bibin layîq.”
Herî dawî bavê Şahîn Cîlo, Ahmet Alas axivî, spasiya girseyê kir û got ku ew ê xwedî li têkoşîna Şahîn Cîlo û hevalên wî derkevin. Serdan piştî duayan bi dawî bû.
