Hejmareke bijîşkên bajarê Qamişlo û komeke xwendekarên fakulte û peymangehên tenduristiyê yên Zanîngeha Rojava bi desteka Tevgera Civaka Demokratîk (TEV-DEM) wek ekîb alîkariya tibî pêşkêşî koçberan dikin.
Vê ekîbê di dema hatina koçberên Efrînê ji Şehbayê de (2 Kanûn 2024) xebatên vekirina navendeke tenduristiyê dabû meşandin, niha bi koçkirina wan a careke din re 6’ê Çileyê ji taxên Şêxmeqsûd û Eşrefiyê yên Helebê, her wiha ji Tebqa û Reqayê bi rêya klînîka gerok alîkariyê dikin.
Ekîb dermanan wek alîkarî ji dermansaz û rêxistinan werdigirin. Rojane ji bo şopandina rewşa tenduristî ya koçberan li dibistan, mizgeft, avahiyên saziyan û baxçeyên zarokan digerin û wan tedawî dikin.
Dema nexweşiyên koçberan giran bin an bi hacetî emeliyatê bin, bi rêya gera xwe vê yekê tesbît dikin û wan nexweşan sewqî nexweşxaneyan dikin. Bijîşkên ku di ekîbê de cih digirin li Nexweşxaneya Gel a Qamişloyê wan tedawî dikin.
Bijîşkên ji pisporiyên cuda cihê xwe di nava ekîbê de digirin. Bijîşka jinan Şoreş Osman ku wek çavdêr di ekîbê de ye, dibêje wan heta niha ji bo jin û zarokan emeliyatên ji bo hestî û sezeryan çêkirine, 3 zarokên ku nû ji dayik bûne li nexweşxaneyê derbasî kuvozan kirine.
Nexweşên ku bi nexweşiyên domdar ketine, ji bo wan derman peyda dikin, ji bo zarokan jî dermanên nexweşiyên çerm û şewbê dabîn dikin.
Li kantona Cizîrê bi rêya Heyva Sor a Kurd jî xebateke bi vî awayî tê kirin.
