Ji bo protestokirina binpêkirinên mafên girtiyan, TUAY-DER’ê li pêşiya Girtîgeha Tîpa T a Aksarayê daxuyanî da. MED TUHAD-FED, AATUHAY-DER, şaxên OHD’ê yên Edene û Mêrsînê, TJA, rêxistinên DEM Partiyê yên Edene û Mêrsînê, Meclisa Dayikên Aştiyê yên her du bajaran û gelek xizmên girtiyan tevlî bûn. Di daxuyaniyê de pankarta “Dawî li sepanên keyfî bînin, ji girtiyên nexweş re azadî” hate hilgirtin. Her wiha gelek caran dirûşmên “Bijî berxwedana zindanan”, “Em ê bi berxwedanê bi ser kevin” û “Berxwedan jiyan e” hatin berzkirin.
Hevserokê Çukurova TUAY-DER’ê Mahsum Geçer di daxuyaniyê de got ku binpêkirinên li girtîgehan îstîsna nînin û veguheriye polîtîkayekê. Geçer, got: “Girtî, her roj rastî gelek binpêkirinên mafan tên. Îşkence, miameleya xerab, cezayên disiplînê yên keyfî, sirgunkirina girtiyan a li girtîgehên dûrî malbatên wan, taloqkirina tehliyeyên girtiyan ên bi hincetên razber çendek ji van binpêkirinan e. Her wiha girtiyên nexweş nayên tedawîkirin û terkî mirinê dikin. Bi taybet jî sepanên weke lêgerîna tazî, di dema tedawiyê ferzkirina kelemçeyê, lêgerîna nava dev û hwd. êdî veguherîne sepanên sîstematîk. Ji ber vê jî girtî çûna nexweşxaneyê red dikin û ji mafê xwe yê tenduristiyê bêpar dimînin.”
‘TEHLIYE BI KEYFÎ TÊN ASTENGKIRIN’
Geçer, anî ziman ku Lijneya Îdare û Çavdêriyê ji bo taloqkirina tehliyeyên girtiyan û cezayên disiplînê biryarên keyfî dide û wiha pê de çû: “Biryarên lijneyê, di serî de mafên azadî û ewlehiyê, gelek mafên bingehîn ên girtiyan binpê dike. Nediyarbûna dema înfazê, bi xwe re binpêkirina mafê darizandina adilane jî tîne. Weke mînak; tehliyeya Tamer Tanrikulu yê li Girtîgeha Tîpa T a Aksarayê tê ragirtin û 30 sal in girtî ye ji bo 2 salan; ya Hasîp Avşar 6 mehan; ya Abdullah Çelîk jî ji bo 3 mehan hatiye taloqkirin. Li heman girtîgehê tehliyeya Sînan Yaşar ji bo 2 salan, ya Ahmet Goksu ji bo 3 mehan û Mervan Sungur jî ji bo 3 mehan hatiye taloqkirin. Li Girtîgeha bi Ewlekariya Bilind a Eregliyê jî tehliyeya Haci Sîncer ji bo salek û 3 mehan, ya Mehmet Alî Taşli ji bo salekê, ya Mehmet Zahît Bayar ji bo 2 salan, ya Mehmet Mencîk ji bo salek û 6 mehan, ya Sînan Çelîk jî ji bo 6 mehan hatiye taloqkirin. Li girtîgehên Osmaniye û Tarsusê jî bi heman hincetan tehliyeyên girtiyan hatine taloqkirin. Bi van sepanan re mafê berdana bişert bi awayekî keyfî tê xespkirin û rê li ber vedike ku hêza cezakirinê ya dewletê bêdawî were bikaranîn. Divê Lijneyên Îdare û Çavdêriyê tavilê bên girtin û ev mekanîzmayên rayeya darazê xesp dikin tavilê bên bidawîkirin.”
‘DIVÊ PÊVAOYA REFORMÊ WERE DESTPÊKIRIN’
Geçer, bal kişand ser îzolasyona li dijî girtiyan û ev tişt anî ziman: “Bi avakirina girtîgehên tîpên S, Y û ewlekariya bilind re girtî di hucreyên yekkesî de tên ragirtin û îzolasyona civakî kûrtir bûye. Ev girtîgeh, veguherendine mercên muebbeda girankirî û îşkence û miameleya xerab êdî asayî kirine. Girtî rastî binpêkirinên mafan ên giran tên. Divê ev sazî tavilê bên girtin û astengiyên li pêşiya girtiyan bên rakirin ku mafê xwe yê tedawiyê bi kar bînin û daxwazên girtiyên nexweş ên ji bo taloqkrina înfazê û cezayê li malê bên qebûlkirin. Divê êdî ATK weke tekane otorîte nebe û nêrînên serbixwe û lijneyên zanistî jî esas bên girtin. Ji bo vekirina rêyên çareseriyeke aştiyane ya li Tirkiyeyê û serweriya hiqûqê, divê hewceye ji ewil di saziyên dewletê de pêvajoya reformê ya ji mafên mirovan re rêzgirt were destpêkrin. Li hestiyariya raya giştî em ê têkoşîna xwe bidomînin.”
Wekîlê DEM Partiyê yê Mêrsînê Alî Bozan jî got ku li hemû girtîgehan mafên girtiyan ên peydakirina avê, hîjyen, mafê tenduristiyê, azadiya xwendina pirtûkan û mafên tehliyeyê tên binpêkirin. Bozan, xwest girtiyên tehliyeyên wan bi biryarên Lijneya Îdare û Çavdêriyê hatine taloaqkirin tavilê bên berdan û got: “Dema Meclis di 1’ê Cotmehê de vebû, weke karê ewil divê van lijneyan bigire û ji bo civaka demokratîk û aştiyê gavan biavêje.”
Berdevka Meclisa Dayikên Aştiyê ya Mêrsînê Emîne Eren jî got ku aştî bi gavên yekalî nayê û bang kir ku ji bo aştiyê bi destê Rêber Apo were girtin.
