Li Bakur û Rojhilatê Sûriyeyê êrîşên çeteyên HTŞ û DAÎŞ’ê berdewam dikin. Li hemû cîhanê gelê Kurd û parêzvanên mafên mirovan van êrîşan şermezar dikin û li gelek welatan çalakî tên lidarxistin. Li Bakur jî her roj li bajarên cuda meş û protesto tên kirin. Lê polîs bi awayekî bêqanûn êrîş dike: gelek kes tên derpkirin û binçavkirin. Di du hefteyên dawî de bi sedan kes hatin binçavkirin. Gelek ji wan bêyî biryara qedexekirinê bi sûcên “endamtiya rêxistinê” an “propagandaya rêxistinê” hatin girtin. Li Mêrdînê ku zêdetirî 100 kes li qadê û di operasyonên malan de hatin binçavkirin, zêdetirî 20 kes hatin girtin.
DERPKIRIN, GEF, ZEXTA SÎXÛRTÎ Û GIRTIN…
Li Mêrdîn, Şirnex, Riha, Wan û Bedlîsê heman binpêkirin çêdibin. Di binçavkirinan de zarok jî di nav de herkes bi muameleya xerab, îşkence, heqaret, îfadegirtina bêhiqûqî, gef, çêkirina delîlên bi zorê û zexta sûxûriyê re rû bi rû man. Parêzeran îtiraz kirin, lê gelek caran mafê parastinê hat astengkirin.
Parêzer Cemîl Karakoyun endamê Şaxa Mêrdînê ya ÖHD dibêje ev pêvajo tu aliyê wê yê rewa tune û tenê ji bo tirsandin gel e. Wî îhlalên hiqûqî yek bi yek rêz kir û bal kişand ser rewşa Diyar Koç ku hîn di dermankirinê de ye û îşkence gelek giran dîtîye. Parêzer jî rastî binpêkirinê hatin: di rewşên darpkirinê de doktor rapora darpkirinê nadin, muayene bi polîsan re tê kirin. Di operasyonên malan de jî bi îşkence şîfreya telefonan tê vekirin û delîl têne çêkirin.
‘BINPÊKIRINÊN SÎSTEMATÎK Û BINÇAVKIRIN DIDOMIN’
Karakoyun got: “Ji destpêka salê ve li Mêrdîn û bajarên derdorê, Wan, Amed û bajarên din, hemû welatiyan li dijî komkujiyên li Rojava û derdorê, bi mafê xwe yê destûrî çalakiyên aştiyane kirine. Lê mixabin hem polîs û hem jî dadgeh ji qanûnê derketine. Polîs hem CMK û hem jî Destûra Bingehîn binpê kiriye. Em vê yekê ji nûçeyan û hevalên xwe dizanin.”
‘JI BO DIYAE KOÇ DI ROJA EWIL DE GOTIN NE DI BINÇAV DE YE’
Li ser rewşa Mêrdînê Karakoyun wiha got: “Em bi sîstematîk rastî binpêkirina mafên jiyan û tenduristiyê hatin, mafê parastinê yê me jî hat sînordarkirin. Mînak: Muwekîlê me Diyar Koç. Roja ewil me li Şaxa Têkoşîna li dijî Terorê ya Nusaybînê pirs kir; gotin ‘ew ne di binçavê de ye, ne li wir e’. Lê sibê me fêm kir ku ew li Nexweşxaneya Dewletê ya Amed-Nusaybînê ye. Yanî binçavkirin ji roja berê destpê kiribû, lê polîs agahiya derew da me.”
‘ŞÎFRE BI ÎŞKENCE HATIN STANDIN Û DELÎL HATIN ÇÊKIRIN’
Karakoyun bal kişand ser tundiya li ser zarok û jinan: “Piştî van protestoyên aştiyane, şevên zû operasyonên malan hatin kirin. Derî hatin şikandin, mal ziyan dîtin. Malbatên kesên binçavkirî jî bi gef û heqaretê re rû bi rû man. Gelek malbat bi saetan li erdê, rûyê wan li dîwar hatin sekinandin. Di dema binçavkirinê de darpkirinên giran çêbû: li ber çavê malbatê li ser kesan hate sekinandin, kelepçeya berovajî, lêdan bi tiştên hişk… Bi îşkence û li ber çavê malbatê şîfreya telefonan hat vekirin, delîl hatin çêkirin. Lêpirsîn li ser van delîlan e û muwekîlê min girtî ye.”
‘RAPORA DARPKIRINÊ NEHAT DAYÎN, AJANTÎ HATE FERZKIRIN’
“Di nexweşxaneyan de jî pirsgirêk hebûn. Li Qoserê hevalekî me dixwest îşkenceya sîstematîk di rapora darpkirinê de binivîse, lê destûr nehat dayîn. Li Nisêbînê gelek kesên birîndar û êşandî hene. Jin û zarok bi taybetî bi muameleya xerab re rû bi rû man. Dixwestin hin ciwan bêparêzer îfade bidin, lê ajantî hate ferzkirin.
‘LI SER ÇOKAN ERDÊ, RÛYÊ WAN LI DÎWAR Bİ SAETAN HATİN SEKİNANDİN’
“Di her qonaxê de binpêkirin berdewam kirin. Mafê parastinê yê me parêzeran jî hat sînordarkirin. Muwekîlên me gotin: bi saetan li ser çokan li ser erdê, rûyê wan li dîwar sekinandin, av û xwarin nehat dayîn, bi gef û heqaretê re rû bi rû man. Ev gotin di protokolên îfadeya wan de hene.”
‘TU BINGEHEKE HIQÛQÎ TUNE’
Karakoyun di dawiyê de got: “Ev lêpirsîn û binçavkirin tenê ji bo bêdengkirina bersivên destûrî yên gelê Kurd li dijî bûyerên li Rojava ne. Tenê binpêkirina qada qedexe dibe were nîqaşkirin, lê sûcên endamtiyê û propagandayê tu bingeha wan a hiqûqî tune. Ev girtin û binçavkirin sîstematîk in û armanc wan tirsandin gel e.”
