Cenazeyên 18 şervanên Meclisa Minbic a Leşkerî, Yekîneyên Parastina Jin (YPJ) û Hêzên Sûriyeya Demokratîk (QSD) ên ku di destpêka rizgarkirina bajarê Minbicê di şerê DAIŞ`ê di sala 2016`an û êrişên ku li dijî bajar ji hêla çeteyên dewleta Tirk a dagirker ya di sala 2025`an de şehîd bibûn, ji pakrewangeha şehîdan a bajarê Minbicê veguhestin pakrewangeha Şehîd Dicle ya li bajarê Kobanê.
Meclisa balbatê şehîdan diyar kir ku pakrewangeha şehîdan li bajarê Minbicê ji hêla çeteyên dewleta Tirk a dagirker ve rastî wêrankirinê hat, ji ber vê cenazê veguhestin.
Navên şehîdan wiha ne: Elî Mihemed Emîn El Efrît, Mihemed Horan, Emîr Enber, Alaa Ehmed Selam (navê tevgerî: Cîlan Cûdî), Ziheya Berkel Mihemed, Adil Cuma Zirîf, Ebdulrehman Cemal, Ebdulrehman Iqêlî, Farûq Mihemed El Elî, Mecid El Elî, Mihemed Xelîf El Xelef, Mihemed El Hemdan, Mehmûd Mirî, Mehmûd Yûsif Xelîfê, Miseb Cuma El Miftah, Rojda Bawer û Yûsif Mihemed Diwêcî.
Cenazeyên şehîdan bi merasîmeke bi heybet li Pakrewangeha Şehîd Dicle li bajarê Kobanê bi amadebûna şêniyên bajarê Kobanê û gundewarên wê pêk hat. Beşdarvanên merasîmê cenazeyên şehîdan li Pekrewangeha Şehîd Dicle spartin axê.
Di heman merasîmê de şehadeta şervana YPJ`ê Xemgîn Dilbirîn (Ferîde Welo) û şervanê QSD`ê Dilovan Bîro (Mehmûd Elî) yên ku di dîrok û deverên cuda şehîd bûne hat eşkerekirin.
Merasîm bi toraneke leşkerî ya şervanên QSD`ê û YPJ`ê, pê re jî bi deqeyeke rêzgirtin dest pê kir. Paşê Fermandara YPJ`ê ya bajarê Kobanê Dilbirîn Kobanê axivî û got: “Ev şehîd zilma li ser gelê xwe qebûl nekirin, ji bo serî li hember zilmê netewînin rihê xwe ji bo gelê xwe feda kirin. Divê em îro layiqî wan bin û em wan di dilê xwe de veşêrin. Em ê ji bo parastina destkeftiyan rêya wan bidomînin. Nirxê hebûn û nasnameya gelan biha ye, ew rihê zarokên wan ên keç û kur e, ne ji wan ba em ê negihaştibana serkeftinên mezin.”
Dilbirîn Kobanê da zanîn ku gelê têkoşîn û berxwedan nas kiriye, kuletî û teslîmiyetê nas nake û got: “Kobanê ya ku li şûna hemû cîhanê li ber xwe da, îro careke din dîrokê dinivîsî ne û dersên girêdayî têkoşîn, rûmetê dide û teslîmiyetê qebûl nake. Ev yek bi mohra van şehîdan çêbûye, ev mohra xwe li dîroka têkoşîna gelê Kurd kiriye.”
Dilbirîn Kobanê got: “Em ê destkeftiyên hevalên xwe yên şehîd biparêzin, ev gel teslîm nabe û qebûl nake ku xaka wê bê dagirkirin û hebûna wê bê inkarkirin. Em ê her amade bin ji bo gel û welatê xwe.”
Piştre wesîqeyên şehadetê yên şehîdan hatin xwendin û radestî malbatê wan hate kirin, rêheval û malbatên şehîdan cenazeyên wan bi tilîlî û slogana “Şehîd Namirin” veşartin.
