Meclisa Malbatên Şehîdan a bajarê Şedadê ya kantona Cizîrê ji bo şervanê Hêzên Erka Xweparastinê Ehmed Hesen El Elî yê ku 11’ê Tebaxê li ser wezîfeya xwe li Dêrazorê şehîd bûbû, merasîma oxirkirinê li dar xist. Tevî nûnerên Rêveberiya Xweser û saziyên sivîl û leşkerî, şêniyên bajar û gundewarên wê beşdarî merasîmê bûn.
Merasîmê bi rêzgirtinê û torana leşkerî ya şervanên Hêzên Erka Xweparastinê dest pê kir. Piştre bi navê Meclisa Malbatên Şehîdan a Şedadê Mihemed Xelîl axivî.
Mihemed di axaftina xwe de anî ziman ku bi saya şervanan ew li ber xwe didin û ev li gotinên xwe zêde kir: “Em li vî cihê pîroz kom bûne da ku lehengek ji lehengên ku canê xwe ji bo vê axê dane, oxir bikin. Gelê me bi salan êş kişandiye, lê îro bi saya van lehengan li ber xwe didin.”
Mihemed Xelîl diyar kir ku dê ji bo azadî, rûmet û edaletê berdêlan bidin.
Di merasîmê de ji fermandarên Hêzên Erka Xweparastinê Demhat Hesekê jî axivî û sersaxî ji malbata şehîd Ehmed El Elî û hevalên wî yên li eniyên berxwedanê re xwest.
Piştre nasnameya şehîd hat xwendin û radestî malbata wî hat kirin. Şervanan cenazeyê hevalê xwe hilgirtin û bi tilîliyên dayikan û dirûşman veşartin.
