Cenazeyê endamê HPGê Mehmet Mazlum Ateş (Adil Amed) ê ku di 13yê Çileya 2017an de li Bedlîsê şehîd bibû û cenazeyê wî di heman salê de li Goristana Bêkesan a Wanê hatibû veşartin. Cenazeyê Ateş ji hêla malbata wî ve li Wanê hat wergirtin û ji bo definkirinê anîn Amedê. Dayîkên Aştiyê, MEBYA-DER, endamên saziyên sivîl, malbata wî û gelek kes tevlî merasîma definkirinê bûn. Beriya definkirinê nimêja ji bo cenazeye hate kirin û dua hatin xwendin. Cenazeyê Ateş bi dirûşmeyên ‘Şehîd namirin’, ‘ Rêya şehîd rêya me ye’ anîn Goristana Yenîkoyê ya navçeya Rezanê û li wir hate veşartin.. Piştî veşartina cenazeyê deqîqeyek rêz hate girtin û sirûda “Çerxa Şoreşê” hate xwendin.
‘GER GELÊ KURD HEBE EW BI SAYA TÊKOŞÎNA WAN E’
Hevserokê MEBYA-DERê Ramazan Dengîz piştî definkirinê axivî. Ramazan Dengîz diyar kir ku bi tekoşîna cangoriyan dengê gelê Kurd gihîşte cîhanê û wiha got: “Wan tekoşîneke mezin da. Heke gelê Kurd hebe bi saya tekoşîna wan heye. Her tim xewn û xeyalên wan ji bo mirovahiyê û gelê Kurd bû. Wek hûn dizanin îro roja aştiyê ya cîhanê bû. Şehîdên me û serokê me Birêz Ocalan her tim ji bo aştiyê tekoşîn dan. Xwestin ku li Rojhilata Navîn û welatê me aştî û aramî çêbibe. Du sal in pêvajoya Aştî û Civaka Demokratîk heye û em piştgiriyê didinê. Em naxwazin ku dayîkên me êdî bigirîn.”
Ji bo Ateş dê sibê li Mala Şînê ya Haci Kadrî Davûtoglu ya Dîclekentê ya Peyasê bîranîn were lidarxistin.
