Meclisa Malbatên Şehîdan a Dêrikê îro ji bo veşartina cenazeyê şervanê Hêzên Sûriyeya Demokratîk şehîd Egîd Girkê Legê (Xebat Silêman) ku di 18’ê Çileya îsal de li Dêrazorê şehîd bûbû, merasîmek li dar xist.
Girseya gel li ber Nexweşxaneya Şehîd Hogir kom bû da ku cenazeyê şehîd wergire û piştre ber bi Pakrewangeha Şehîd Xebat a li Dêrikê ve çû.
Merasîm bi rêzgirtinê destpê kir, piştre ji fermandarên QSD’ê Xalid Koçer axivî û diyar kir ku QSD’ê Sûriye ji çeteyan parastiye û mafên gelên bindest parastine û ew ê rûmeta hemû gelan biparêze.
Endamê Meclisa Malbatên Şehîdan a Qamişloyê Henan Mamo jî destnîşan kir ku Rojava dê bi saya berxwedana hêzên xwe û baweriya bêdawî ya gelê Kurd û fedakariya şehîdan, domdar û serfiraz bimîne. Mamo destnîşan kir ku şoreşa Rojava yekitiya gelê Kurd li hember hemû hêzên ku hewl didin destkeftiyên wan têk bibin nîşan daye.
Endamê Kongreya Îslama Demokratîk Ebdulselam Faris jî got, xwîna şehîdan ji bo hemû gelan û kesên azad çirayek e û bi vê çirayê gel û netewe bi azadî û rûmet dijîn. Faris wiha dewam kir: “Divê gel her gav fedekariyên şehîdên xwe yên ku canê xwe ji bo parastina destkeftiyan feda kirine, bi bîr bîne.”
Piştî axaftinan belgenamaya şehîd hat xwendin.
Cenazeyê şehîd Egîd Girkê Legê bi tilîlî û dirûşmên “Şehîd namirin” spartin axê.
