Ciwanên li ser banga Platforma Ciwanên Welatparêz ên Demokratîk li navçeya Rezan a Amedê li hev kom bûn, bi dirûşmeya “Bi Rêberê azadiyê ber bi jiyana azad ve” meşiyan. Ciwanên ji bajarên cuda yên Kurdistan û Tirkiyeyê hatibûn û nûnerên partiyên siyasî û saziyên sivîl beşdarî meşê bûn. Girseyê bi dirûşmeyên “Bijî Rêber Apo” û “Ciwan fedaiyên Rêber Apo ne” berz kirin, pankart hilgirtin û stranên ji bo Rêber Apo gotin.
Ciwanên ku gihîştin Deriyê Rihayê ji aliyê polîsan ve hatin rawestandin. Ciwanan dema ku dirûşmeyên “Em ê cîhana bêyî Ocalan hilweşînin” û “Bi can bi xwîn Serokê me Ocalan” berz kirin, polîsan bi gaza îsotê û guleyên plastîk êrîşî ciwanan kirin. Tevî êrîşê jî, ciwanan daxuyanî dan û berxwedana xwe domandin.
DENGÊ KU JI ÎMRALIYÊ BILIND DIBE KILÎDA ÇARESERIYÊ YE
Li ser navê platformê Medya Aslan daxuyanî da û bal kişand ser rola Rêber Apo ya di têkoşîna azadiyê ya gel de. Medya Aslan diyar kir ku Rêber Apo bangek dîrokî ji bo civakek aştîxwaz û demokratîk kir û di nav gel de hêviyek mezin çêkir û got, “Tevî ku 27 sal in li Îmraliyê di bin tecrîdek giran de ye jî, Rêber Apo nefeseke azadiyê da bi mîlyonan mirovan.”
Medya Aslan anî ziman ku dengê ji Îmraliyê bilind dibe rê li ber çareserî û diyalogê vekiriye û destnîşan kir ku heta Rêber Apo azad nebe, gelên Rojhilata Navîn nikarin di nava aştiyê de bijîn. Medya Aslan bertek nîşanî êrîşên li Meclisê yên li ser Rêber Apo û şandeya Îmraliyê, da û got, “Tu hêz nikare dengê aştiyê qut bike. Helwesta şandeya Îmraliyê helwesta bi rûmet a dîrokî ye.”
‘TEKOŞÎNA AZADIYÊ WÊ BERDEWAM BIKE’
Ciwanan diyar kirin ku meş ne çalakiyek bû, banga ji bo vînê bû û heta ku azadiya fîzîkî ya Rêber Apo misoger bibe ew ê têkoşîna xwe bidomînin. Medya Aslan got, “Eger Rêber Apo azad bibe, wê aştî li ser van axan serwer bibe.”
Piştî meşê, sekna ciwanan didome.
