Li Bîrdariya Enfalê ya li navçeya Çemçemalê bi amadebûna qeymeqamê Çemçemalê û xizmên mexdûrên enfalê, merasîmek ji bo xelatkirina Qasim Kazim ku ciwanekî xelkê Çemçemal e û yekem kes bû cihê Ecac Tikrîtî (celadê Nugreselman) diyar kirî, hat lidarxistin. Her wiha beşek ji wan kesên ku gilî li dijî Ecac Tikrîtî tomarkiribûn û di dema dadgehkirina wî de amadebûn jî hatin xelatkirin.
Piştre di merasîmê de Rêvebirê Bîrdariya Enfalê Habîl Hacî Ehmed, Qeymeqamê Çemçemal Aso Bekir û Berpirsê Malbenda 12 a YNK’ê Newşîrwan Hesen axivîn.
Di axaftinan de daxwaz hat kirin ku hemû kesên destê wan di tawanê enfalê de hene, werin girtin û cezakirin. Her wiha daxwaz ji hikûmeta Iraqê jî hat kirin ku gorên komî yên dema enfalê veke û cenazeyan radestî malbatan bikin.
Di dawiya merasîmê de jî xelata rêzgirtin û spasiyê pêşkêşî ciwanê bi navê Qasim Kazim ku yekem kes bû cihê Ecac Tikrîtî eşkere kiribû û malbatên ku gilî li dijî Ecac tomarkiribûn hat kirin.
‘CELADÊ ENFALÊ’ ECAC KÎ YE?
Ecac Ehmed Tikrîtî ku weke ‘Celadê Enfalê’ tê naskirin, sala 1962’yan li wîlayeta Selahaddînê ji dayik bû. Di sala 1986’an de ji Koleja Ewlekariyê ya Mîllî mezûn bû û piştî 37 salên li ser operasyonên Enfalê re derbas bûn, di 31’ê Tîrmeha 2025’an de li bajarokê Zuluiyeyê hate girtin.
Roja 31’ê Tîrmeha 2025’an Nivîsgeha Şanaz Îbrahîm Ehmed ragihand ku yek ji sûcdarên sereke yê Gîrtîgeha Nugre Selman Ecac Tikrîtî bi navê xwe yê din Ecac Ehmed Herdan ku wek celadê Kurdan tê nasîn, hat girtin.
Roja 14’ê Gulana 2026’an li Dadgeha Resafe ya Bexdayê di runiştina duyem a darizandina ‘celadê Kurdan’ Ecac Tikrîtî de dadwer biryara darvekirinê ji Ecac Tikrîtî re derxist.
