Ajansa Nûçeyan a Reutersê di nûçeya xwe de ya bi sernavê “Tirkiyeyê piştî pêşniyara aştiyê Şaredarên Kurd ji wezîfeyê girt” hate weşandin, bi bîr xist ku desteserkirina îradeyê piştî daxuyaniyên şefê MHP’ê Devlet Bahçelî hate kirin.
Ajansê di nûçeya xwe de ragihand ku Hevserokê berê yê HDP’ê Selahattîn Demîrtaş jî di nav de siyasetmedarên Kurd beriya 8 salan di heman demê de hatin girtin.
Associated Pressê jî di nûçeya xwe de ya bi sernavê “Tirkiyeyê 3 şaredarên alîgirê Kurd ên hatin hilbijartin ji wezîfeyê girt û li şûna wan rayedarên dewletê tayîn kir” hate weşandin, diyar kir ku bûyer nîşan didin, wê şefê AKP’ê Recep Tayyîp Erdogan li hemberî muxalefetê polîtîkayeke tund bimeşîne.
AP’ê di nûçeya xwe de her wiha destnîşan kir ku bûyerên diqewimin di mijara hewldaneke nû ya aştiyê de ya ji bo bidawîkirina şerê 40 salan dibe sedema pirsan.
France24 jî bûyer bi sernavê “Tirkiyeyê 3 şaredarên li Başûrrojhilat ji wezîfeyê girt ku piraniya herêmê ji Kurdan pêk tê” qala desteserkirina şaredariyan kir. Di nûçeyê de hate ragihandin ku Tirkiye polîtîkaya qeyûm dewam dike û beriy aniha bi 6 mehan jî li Colemêrgê îrade hate desteserkirin. Qenalê di nûçeya xwe de bal kişand ser nerazîbûnên ji DEM Partî û CHP’ê hate nîşandan.
Ajansa nûçeyan a fermî ya Çînê Xinhuayê zimanekî weke ya çapemeniya nêzî AKP-MHP’ê bi kar anî û di nûçeya xwe de sûcdariyên ‘terorê’ yên têkildarî şaredaran da pêş.
Al-Monitor jî bûyer bi sernavê “Di demekê de ku hewl tê dayin lihevkirin bi PKK’ê re çêbibe 3 şaredarên Kurd ên li Tirkiyeyê ji wezîfeyê hatin dûrxistin” gihand aboneyên xwe.
